PSG barazon në Londër, Arsenali mbetet i dyti
Ekipi i Emerit përfiton nga golat e shënuar në transfertë
Arsenali ka humbur një mundësi të artë për t'u kualifikuar si e para e grupit, duke kaluar në avantazh ndaj PSG-së, por në fund iu nënshtrua barazimit 22. Francezët e nisën lojën me një qartësi më të madhe në sulm, duke shfrytëzuar duelet një kundër një. Nga ana tjetër, "topçinjtë" kërkuan që të furnizojnë Zhirudin me krosime nga krahët, taktikë që nuk dha efikasitet në pjesën e parë. Ishin miqtë që kaluan të parët në avantazh, kur asisti i Matuidis brenda zonës u shfrytëzua shkëlqyeshëm prej Kavanit, që e devijoi saktësisht topin për në rrjetë. Por, në sekondat e fundit të pjesës së parë, Aleksis Sançez u pengua brenda zonës dhe arbitri gjerman Brysh nuk pati dyshime për 11-metërsh. Nga pika e bardhë mendoi Zhirud për të ndëshkuar bashkatdhetarët e tij, duke i çuar skuadrat në dhomat e zhveshjes në barazim. Pjesa e dytë nisi me vrull për vendësit, duke krijuar disa mundësi të njëpasnjëshme shënimi. Por, goli i përmbysjes për ta nuk do të vinte prej këmbëve të një futbollisti të Arsenalit. Ishte Marko Verrati që dërgoi gabimisht topin në portën e tij, duke i dhënë avantazhin skuadrës së Arsen Vengerit. U duk si një gol që do mjaftonte për të vulosur kualifikimin e anglezëve si të parët e grupit, por edhe një herë tjetër treguan se e kanë të vështirë të përballojnë presionin në fushën e lojës. Lukas Moura riktheu sërish baraspeshën në rezultat, duke qenë edhe verdikti përfundimtar. Tashmë
është PSG-ja që ruan kryesimin, falë golave të shënuar në fushë kundërshtare, në duelet direkte me Arsenalin. Ndonëse pritet të zhvillohen edhe ndeshjet e fundit për të zyrtarizuar "biletat", takimet e fundit duket se do kenë më tepër vlerë për skuadrën e vendit të tretë...