Napoli mbetet “thatë”, e pret finale në Lisbonë

Napoli nuk ka mundur që të marrë më shumë se një pikë në shtëpi, kur priste skuadrën e vendit të fundit, Dinamon e Kievit. Ukrainasit zbritën në fushë me synime të qarta, duke u rreshtuar me forca të shumta në mbrojtje. Ndërkohë, trajneri Mauricio Sarri kishte hedhur një ekip sulmues, por me shtat të shkurtër, si Mertens, Kajehon dhe Insinje, shpejtësia e të cilëve nuk u shfrytëzua prej hapësirave të pakta që patën në dispozicion. Në një ndeshje që foli pothuajse e gjitha për italianët, rastet e mirë për shënim nuk u shfrytëzuan si duhet, duke bërë që takimi të mbyllet në një barazim pa gola. Tashmë kualifikimi do të vendoset në Lisbonë, ku Napoli duhet të evitojë humbjen, për të siguruar një biletë në raundin tjetër. Për hir të së vërtetës, edhe nëse do kishin fituar me Dinamon e Kievit, skenari i tyre do ishte sërish i njëjti në takimin e radhës. Hysaj - Mbrojtësi i kombëtares shqiptare luajti për 90 minuta dhe në fund të takimit u vlerësua me notën 6, duke qenë ndër më të mirët në skuadër. Ai u vlerësua për faktin që askush nuk arriti ta kalojë në krah gjatë gjithë lojës, ndërkohë që në disa raste ka qenë mjaft i dobishëm edhe për repartin ofensiv. Trazirat - Para fillimit të ndeshjes ka pasur një përleshje mes tifozëve dhe policisë jashtë stadiumit. Situata u tensionua kur ultrasit goditën me sende të forta forcat e rendit, ndërkohë që këta të fundit u kundërpërgjigjën me gaz lotsjellës. Përleshjet u spostuan në ambiente publike, duke i vënë flakën edhe një taksie. U raportua për disa të lënduar, por pa probleme serioze. Beshiktashi - Një barazim i çmendur ka qenë ai i realizuar në Turqi. Në pjesën e parë të lojës, Benfika pati të gjithë të drejtën të festojë kualifikimin, pasi e mbylli me rezultatin 30, falë golave të Guedes, Semedo dhe Fejsa. Por, 45-minutëshi i dytë që pritej të ishte formalitet për ta u shndërrua në makth. Turqit arritën të rikuperojnë gjithçka, duke barazuar rezultatin në 3-3, ku dy prej golave u shënuan në shtatë minutat e fundit. Një pikë që i mban në lojë të dyja skuadrat, ku shanset më të mëdha i ka pikërisht Beshiktashi, pasi me një fitore ndaj Dinamos së Kievit ua siguron pjesëmarrjen në 1/8-at. Ndërkohë, portugezët duhet të marrin patjetër tri pikët në shtëpi, kundër Napolit të Hysajt.