Barça shkëlqen me Mesin, Bajerni “ngrin” në Rusi
Mynshengladbahu shkon në Ligën e Europës pas barazimit
Barcelona kualifiko het si e para e grupit, ndërsa Mançester Siti e ndjek i dyti. Verdiktet e grupit u vendosën një ndeshje para fundit, pasi edhe skuadra që do shkojë në Ligën e Europës u përcaktua dhe do jetë Mynshegladbahu. Luis Enrike nuk i kurseu yjet e tij në transfertën skoceze dhe kjo dha frytet e saj, pasi mundën vendësit e Sëlltikut me rezultatin 2- 0. Lionel Mesi bëri gjithçka i vetëm, duke realizuar dy herë dhe duke kapur kuotën e nëntë golave në fazën e grupeve, në ndjekje të rekordit që mbahet nga Ronaldo, me 11. Argjentinasi shënoi një gol spektakolar në të 24-ën, kur kontrolloi bukur një asist me "telekomandë" të Nejmarit dhe shkundi rrjetën e Gordonit. Ndërsa, për të vulosur triumfin, u desh minuta e 55- të, kur e gjeti rrugën e rrjetës nga pika e bardhë e penalltisë. Ekipi i Brendan Roxhersit e pati të pamundur që të evitojë disfatën, duke iu nënshtruar supremacisë së kundërshtarit, që iu afrua edhe golit të tretë, kur Suarez goditi shtyllën. Në ndeshjen tjetër, Pep Guardiola festoi së bashku me kundërshtarët në përfundim të takimit. Barazimi 1-1 mjaftoi që "milionerët" të konfirmojnë pjesëmarrjen në 1/ 8- at, ndërsa gjermanët e Mynshengladbahut të sigurojnë Ligën e Europës. Ishin vendësit që shënuan të parët me anë të Rafael, por Silva barazoi brenda pjesës së parë. Stindl në të 51- ën dhe Fernandonjo 13 minuta më vonë bënë që skuadrat të luanin me një futbollist më pak, pasi u ndëshkuan me karton të kuq. Gjithsesi, kjo nuk ndikoi për të ndryshuar ritmin e lojës, duke qenë se ekipet iu kënaqën rezultatit dhe në minutat e fundit menduan më tepër për ta ruajtur, sesa për të kërkuar fitoren. "Jemi shumë të lumtur. Ne ishim të vetëdijshëm që nuk mund të rivalizonim me Barcelonën dhe Mançester Sitin për një nga vendet e para, por ia dolëm që të lëmë një rival pas vetes. Do vazhdojmë të jemi pjesë e Ligës së Europës dhe kjo na mban
të motivuar në maksimum. Do ishte e padrejtë që të eliminohemi nga kompeticionet kontinentale, pasi mendoj se kemi dhuruar një futboll cilësor deri tani", u shpreh trajneri i Mynshengladbahut në përfundim të ndeshjes së djeshme.