Skënderbeu do kthesën, Agostineli ndryshon formacion
Trajneri u jep zemër lojtarëve: Meritonim fitoren në Gjirokastër
Barazimi i marrë në Gjirokastër kundër Luftëtarit nuk ishte rezultati më i mirë për Skënderbeun që ka akuzuar edhe mohimin e një 11-metërshi në favor të Latifit, por bardhekuqtë tashmë janë të vendosur të lënë gjithçka pas krahëve. Një gjë të tillë duhet ta bëjnë për faktin se nesër do të luhet në Shkodër një tjetër ndeshje e rëndësishme ku Skënderbeu do të ketë përballë Vllazninë, e cila po kalon një formë të shkëlqyer për momentin. Pikërisht këtë gjë të tijve ua ka bërë me dije vetë trajneri Agostineli ditën e djeshme para seancës stërvitore. Numri një i pankinës korçare u ka kërkuar të tijve që të
jenë të përqendruar dhe të mendojnë vetëm për takimin e radhës që është një tjetër sfidë e vështirë për kampionët. "Ndeshjen kundër Luftëtarit duhet ta lëmë pas shpinë tashmë dhe të mendojmë vetëm për takimin e radhës që kemi përpara. Bëhet fjalë për një ndeshje tjetër delikate dhe të vështirë pasi kështu
janë të gjitha ndeshjet e kampionatit. Për këtë arsye duhet të harrojmë të djeshmen dhe të mendojmë vetëm sot", ishin fjalët e para të Agostinelit që vijoi më tej. "Të gjithë e dimë se këtë takim duhet ta fitonim, pasi episodet treguan qartë se na u mohua fitorja, por tashmë çdo gjë duhet lënë pas. Të mos
mendojmë më për Luftëtarin, por të përqendrohemi në Shkodër. Dua të shikoj në këtë takim një ekip të vendosur për të marrë tri pikët, një ekip të balancuar në mesfushë të kujdesshëm në prapavijë, si dhe cinik para portës", ishin veç të tjerash fjalët që Agostineli shkëmbeu me ekipin e tij para se të fillonte analizën e kundërshtarit për disa minuta të tjera. Formacioni - Pasi përfundoi analizën me ekipin, trajneri italian u përkushtua mjaft te puna e lojtarëve në fushë, atje ku ndau qartazi edhe formacionin e titullarëve që do të luajë në Shkodër. Ndryshe nga takimi kundër Luftëtarit, trajneri italian do të rikthehet sërish te skema 4-4-2, kjo pas rikuperimit të Radasit dhe Salihit, të cilët do të jenë në fushë nga minuta e parë. Me rikthimin e tyre në formacion, sidomos të sulmuesit shkodran, ai që do ta pësojë është pikërisht japonezi Masato Fukui. Llazi Saro