Apolonia shpartallon Kamzën, Demiraj shënon 31 pikë
Pas ndeshjeve të Kupës së Shqipërisë, dje u rikthye kampionati kombëtar i basketbollit. Në ndeshjen hapëse të javës së 6-të të femrave, Apolonia mposhti 88-47 Kamza Basket në fushën e kësaj të fundit. Kamzaliet e nisin sfidën me fieraket duke shënuar dhe dy pikët e para me anë të Bakallit, por deri në fundin e periodës së parë nuk kanë mundur të shkojnë më shumë se 8 pikë. Pas një serie barazimesh deri në pikën e 8-të, 2-2, 4-4, 6-6 dhe 8-8, më pas janë fieraket ato që shënojnë radhazi 11 pikë duke mbyllur periodën në favor 8- 19. Edhe në periodën e dytë janë fieraket që janë superiore. Skuadra mike është e saktë në finalizime, ku spikat Anxhela Demiraj, e cila shënon 13 pikë gjatë kësaj periode. Vendëset provojnë të rivalizojnë deri diku, por nuk ia arrijnë për shkak edhe të lojtareve me moshë të re. Jo pak herë gjuajtjet e tyre drejt koshit nuk arrijnë te tabela. Te kamzaliet, Fiona Oruçi shënon 6 pikë. Kështu perioda e dytë mbyllet 25-10 sërish për Apoloninë. Pjesa e dytë e takimit sjell shumë zëvendësime në radhët e të dyja skuadrave. Qëllimi i skuadrës së Kamzës ishte më shumë testimi i lojtareve, ku shumica janë të moshës 14-15 vjeç. Edhe Apolonia i përgjigjet me basketbollistet e stolit. Edhe kjo periodë fitohet nga Apolonia 24- 10. Rezistenca e vajzave nga Kamza do të vijë në periodën e fundit, ku dallohet Nurçellari, Spahi, Bezati dhe pikëshënuesja më e mirë, Oruçi. Te skuadra fierake spikasin, veç Demirajt dhe Romilda Hyskës, edhe të rejat Kica, Velias e Çuko. Kjo periodë ka qenë më e bukura, ku të gjitha aksionet kurorëzohen me pikë nga të dyja skuadrat. 1920 përfundon perioda e fundit e takimit dhe krejt ndeshja 47- 88 për Apoloninë. Pikëshënuesja më e mirë e skuadrës fierake ishte Demiraj me 31 pikë, ndërsa për Kamzën, Oruçi me 23 pikë të realizuara. Pas takimit, Oruçi u shpreh: "E dinim se do ta kishim të vështirë takimin me Apoloninë për faktin se kjo skuadër ka lojtare me përvojë. Megjithatë, ne mundëm t'i rezistonim sidomos në periodën e fundit, ku edhe mund ta fitonim. Falënderoj profesorin tonë, Maksim Kristo, i cili ka arritur të krijojë një skuadër krejtësisht të re dhe që shpresojmë të konsolidohemi edhe më tepër në vazhdim të kampionatit. Gjithashtu përfitoj nga rasti të falënderoj prindërit, të cilët më kanë mbështetur vazhdimisht, madje nuk mungojnë as në ndeshjet që ne zhvillojmë", u shpreh Oruçi. Abdulla Dushku
APOLONIA:
GJYQTARË: