Shtubina tregon prapaskenën: I thamë Agoviçit të mos lëvizte
Kapiteni zbardh këshillën që i dha portierit
Kapiteni i Vllaznisë, Ndriçim Shtubina, ka qenë një nga më të mirët në fushë në ndeshjen e djeshme ndaj Skënderbeut. Është parë shpeshherë si në sulm, ashtu edhe në mbrojtje duke bërë maksimumin e tij, ndërsa ka festuar me pjesën tjetër të ekipit pikën e rëndësishme që kuqeblutë kanë marrë. "Personalisht, po kaloj një formë të mirë, por nuk më takon mua të flas për objektivat e ekipit. Ndeshje pas ndeshjeje ne i marrim gjërat me radhë. Duhet të rrimë me këmbë në tokë dhe të vazhdojmë punën", ka thënë Shtubina për "Supersport" pas ndeshjes. Ndërkohë që ai ka komentuar edhe faktin e skuadra e tij ka marrë rezultat pozitive ndaj ekipeve pretendente. "Kënaqesh kur sheh këto rezultate që kemi arritur me skuadra më të forta, edhe pse mundësitë janë për t'i fituar edhe këto ndeshje. Skuadra ka cilësi dhe në ndeshjen e fundit e kemi rregulluar disi edhe pjesën e lojës kur e kemi ne topin në zotërim. Kemi rregulluar disa gabime që kishim bërë më parë dhe këto pikë po i marrim me shumë kujdes e meritë", ka vazhduar Shtubina.
Këshilla - Në momentin që Hamdi Salihi mori topin në dorë për të goditur 11- metërshin e fituar po nga ai, Shtubina është parë që t'i flasë nga afër portierit Agoviç, i cili deri në ato momente kishte bërë një paraqitje të mirë. Në deklaratën e dhënë për "Panorama Sport", Shtubina, në lidhje me këtë temë, ka thënë: "Nuk isha vetëm unë, pasi së bashku me Bicin i kemi thënë portierit që të mos lëvizte nga vendi. Ndoshta ishte diçka instiktive nga të dy ne", ka përfunduar Shtubina. PortieriAgoviç arriti të priste me lehtësi gjuajtjen e Salihit.