Barazim mes polemikave në Laç
Gjirokastritët luajnë për 45' me dhjetë lojtarë, shënohet edhe një gol “fantazmë”
Dukej si një histori e parë disa herë ajo që ndodhi në ndeshjen Laçi-Luftëtari, e cila përfundoi 2-2: për mënyrën se si shkuan gjërat në ndeshjen e fazës së parë dhe për mënyrën se si rrjedhin ndeshjet e gjirokastritëve. Minutat e fundit rezultojnë edhe një herë vendimtare për të dyja skuadrat. Në fazën e parë iu buzëqeshën gjirokastritëve, ndërsa këtë herë kurbinasve. Barazim spektakolar në Laç, në një ndeshje që kishte gjithçka brenda saj: gola, raste, kartonë të kuq, diskutime dhe raste për moviolë. Miqtë gjirokastritë e panë veten në epërsi 02 pas nëntë minutash, por pas 90 minutash ishin 2- 2. Kjo, falë karakterit të Laçit dhe shpërdorimit të shumë rasteve. Dopieta e Akuinjos zhvlerësoi dy golat e shënuar nga Bojom dhe Bregu.
Luftëtari, "zjarr" - As gjirokastritët ndoshta nuk e kishin menduar një nisje kaq spektakolare të ndeshjes. Pas dhjetë minutash lojë e shohin veten në epërsinë e dy golave. Fillimisht shënoi Bojom një supergol, pas një krosimi në zonë duke u koordinuar në mënyrë perfekte. Më vonë, Bregu dyfishoi rezultatin dhe kjo ishte paralajmërim për një ndeshje të zjarrtë dhe spektakolare. Pritshmëritë u përmbushën të gjitha.
Akuinjo zgjon Laçin - Pas dy golave të shënuar, gjirokastritët tërhiqen dhe mendojnë për të mbrojtur rezultatin. Nga ana tjetër, ekipi vendës fillon të hidhet në kërkim të golit të parë që do të rihapte ndeshjen. Laçi filloi të krijonte epërsi në fushë. Ndërkohë ekipi i Milinkoviç u mundua të aplikonte kundërsulmet, por nuk rezultuan shumë efikase. Luftëtari shpërdoron shumë raste me Rexhinaldon dhe Bregun, ndërsa Laçi kthehet në lojë me golin e Akuinjos. Braziliani përfiton nga një rrëmujë në zonë dhe me kokë kalon portierin. Topi largohet pa e prekur rrjetën dhe lojtarët e Luftëtarit protestojnë.
Beqiri, me të kuq - Fundi i pjesës së parë rezulton fatal për Luftëtarin, pasi kapiteni Beqiri largohet me karton të kuq nga arbitri Alla. Më parë ai kishte marrë një të verdhë dhe në ndërhyrjen e parë u ndëshkua me karton të kuq. Kjo gjë i ndërlikoi punët e trajnerit Milinkoviç, ndërsa më parë Alla kishte toleruar një bërryl ndaj sulmuesit Rexhinaldo. Në fundin e ndeshjes barazohen lojtarët, pasi Lipi merr karton të kuq.
Shpërdorime dhe gol - Pjesa e dytë nis me të njëjtin ritëm si e para, ku Laçi provonte të shënonte, ndërsa Luftëtari krijoi 3 raste të pastra për të shënuar golin vendimtar. Bregu gabon përballë Selmanit, i cili bën një pritje të mrekullueshme. Kurbinasit nuk u dorëzuan në asnjë moment dhe përfituan nga superioriteti numerik për të krijuar volum. Lushkja dhe Akuinjo iu afruan shumë golit, por pa arritur t'ia dilnin. Ishte pikërisht braziliani që vendos baraspeshën në minutën e 90-të falë një goli që erdhi nga një tjetër goditje standarde. Me këtë barazim, diferenca mes Luftëtarit dhe Laçit mbetet katër pikë.