Kupa, Teuta kualifikohet në gjysmëfinale
Fitueset në fuqi i fituan të treja eliminatoret
Barleti Volej dhe Teuta janë dy skuadrat që vijojnë për më tej rrugën drejt gjysëmfinaleve të Kupës së Shqipërisë në volejbollin e femrave. Kryeqytetaset, edhe pse ishin të kualifikuara që pas sfidës së dytë, nuk toleruan asgjë dhe triumfuan edhe në ndeshjen e djeshme 3-0 ndaj Vllaznisë. Me po të njëjtin rezultat, fitoi edhe Teuta vendase ndaj Lushnjës, duke siguruar një biletë për në katërshen gjysmëfinaliste. Lushnja dhe Vllaznia, përveçse paraqitjeve të mira, nuk mundën të bëjnë më shumë dhe u ndanë këtu me këtë trofe. Ndeshja e parë që u zhvillua dje në “Ramazan Njala” ishte ajo mes Teutës dhe Lushnjës. Vendaset dominuan gjithçka dhe kjo u duk që me fillimin e setit të parë. Lojtaret bregdetare nuk gabojnë asgjë. Mbrojnë mirë dhe sulmojnë me mjaft efikasitet, duke bërë që ky fraksion të mbyllet 25- 6. Në të dytin Lushnja bën një prezantim shumë më të mirë. Loja e saj pëson rritje të ndjeshme në të gjitha aspektet, por pavarësisht
Nga ndeshja e djeshme Teuta-Lushnja kësaj Teuta i ka forcat e duhura për ta mbyllur dhe këtë set në favor. Lushnjaret nuk i humbin shpresat edhe në setin e tretë, pasi tregohen shumë agresive që në fillim dhe shpresojnë përmbysjen. Luajnë me ritëm të lartë deri në fund, por eksperienca dhe cilësitë e durrsakeve bëjnë diferencën, duke bërë që e gjithë ndeshja të mbyllet 3-0. Edhe kampionet e Barleti Volej zhvilluan një ndeshje që e komanduan prej fillimit. Duke qenë se ishin të kualifikuara, trajneri Hasan Gurabardhi eksperimentoi shumë dhe i dha mundësi për të luajtur edhe atyre lojtareve që deri më tani ishin aktivizuar më pak. Vllaznia pas fitores së dy ditëve më parë ndaj Lushnjës shpresonte në ndonjë hap të gabuar të Teutës dhe nga ana tjetër mendonte të bënte më të mirën ndaj kampionëve. Me gjithë tentativat dhe rezistencën e shkodraneve, skuadra e Barletit ishte shumë e fortë për ta, duke bërë që ndeshja të mbyllej 3-0 në disfavor të tyre.