Roma fiton derbin e nervozizmit
Strotman dhe Naingolan shtrijnë në tapet Lacion dhe nuk shkëputen nga Milani e Juvja
Kryeqyteti është për të katërtën herë një pronë e verdhekuqve. Derbi Lacio-Roma nuk ka zhgënjyer edhe një herë tjetër, duke ofruar emocione shumë të forta, nga goditjet e ashpra në fushë, protesta për arbitrimin, por edhe të përjashtuar. Në fund, rezultati shënon 2-0 për djemtë e Luçiano Spaletit, të cilët u falen dy golave në pjesën e dytë të realizuar nga Kevin Strotman dhe Razha Naingolan. Me këtë sukses, “ujqërit” kanë kapur Milanin në vendin e dytë dhe mbajnë në 4 pikë distancën nga Juventusi kryesues.
Ekuilibër dhe dhunë – Fraksioni i parë i lojës ishte shumë i ekuilibruar, me të dy ekipet që ishin të përqendruar më shumë për të goditur ashpër njëri-tjetrin, sesa për të shënuar. Një nga viktimat e kësaj beteje të dhunshme ishte Bruno Peres, që mori një të çarë, ndërsa i vetmi rast për t’u shënuar si i rrezikshëm ishte ai i minutës së 13-të, ku laciali Çiro Imobile mori një top perfekt në qendër të zonës, por goditi në mënyrën më të shëmtuar të mundshme, duke falur një gol gjysmë të bërë. Ndërsa verdhekuqtë pretenduan një penallti në të 28-ën, më saktë e fituan, por më pas iu ndryshua nga arbitri në një goditje dënimi në hyrje të zonës, pas një dopio konfrontimi me ndihmësit e tij në fushë. Ndërsa
Roma, e cila edhe pse pa Mohamed Salahun pa sërish kapitenin Françesko Toti jashtë formacionit titullar, u pa në brendësi të zonës së Lacios vetëm në fillimin e pjesës së dytë. Në minutën e 53-të, Edin Xheko goditi fort nga brenda zonës, por reagimi i portierit
Federiko Marketi ishte edhe më i bukur sesa tentativa e boshnjakut. Ky duel, XhekoMarketi, do të përsëritej edhe pak minuta më vonë, por sërish ishte mbrojtësi ekstrem i të kaltërve që doli fitimtar. Gjithsesi, Roma fiton terren me kalimin e minutave, derisa në të
64- tën i gjithë “Olimpiko” mund të shpërthente, pasi Strotman përfiton nga një gafë e mbrojtjes laciale dhe me një parabol tund rrjetën. Holandezi feston ndërsa të kaltërve nuk i mbajnë nervat, me Kataldin që edhe pse në pankinë, reagon ndaj Strotmanit dhe kaq mjafton që një sherr masiv të shpërtheje në fushë, ndonëse ai do të mbyllet me përjashtimin e lojtarit të Inzagit. Nervat tradhtojnë Lacion dhe minutat e mbetura të takimit bëhen më të lehta me Romën, e cila gjen edhe golin e dytë, me një goditje nga 27 metra, e cila mbyll ndeshjen.