Sherr në Skrapar, dhunohen gjyqtarët dhe ndërpritet ndeshja
Dhunë në Skrapar. Ndeshja ndërmjet skuadrës vendëse dhe Përmetit nuk ka përfunduar për shkak të sulmit ndaj gjyqtarëve dhe përleshjeve në fushë ndërmjet lojtarëve dhe civilëve të ndryshëm. Çdo gjë shkon normalisht deri në minutën e 92-të kur rezultati ishte 2-1 për Përmetin mik. Në këtë moment, arbitri akordon penallti për çorovodasit. Kaq ka mjaftuar që miqtë të sulmojnë gjyqtarin Allia duke e goditur me grushte e shkelma. Sipas klubit vendës, kanë qenë zv.trajneri i Përmetit dhe kapiteni i kësaj skuadre më aktivët që kanë dhunuar arbitrin. Në këtë moment krijohet rrëmujë në fushë ku hyjnë forcat e rendit dhe civilë. Treshja e gjyqtarëve vrapon për në dhomat e zhveshjes. Bëhet e ditur se kryesori Allia ka marrë mjekim në dhomat e zhveshjes dhe nuk ka pranuar të dalë më në fushë që të vazhdojë ndeshjen. Në këtë mënyrë, takimi është ndërprerë duke mos rinisur më.
Skrapari - Trajneri i Skraparit, Genci Lamçe, që është në të njëjtën kohë edhe në detyrën e sekretarit të klubit, ka deklaruar se kërkon fitoren në tavolinë pas këtij skandali sipas tij të Përmetit. Ai e cilëson një ngjarje të shëmtuar që është shoqëruar me tension të panevojshëm.
Kano - Ndërsa trajneri i Përmetit, Arben Kano, është shprehur: “Ishte i njëjti gjyqtar që na penalizoi disa javë më parë në ndeshjen me Butrintin. Akordoi një penallti inekzistente për Skraparin dhe lojtarët e mi dhe pjesëtarë të stafit protestonin tek ai. Në këtë moment, kanë hyrë civilë në fushë që kanë nisur të godasin me shkelma e grushte zv.trajnerin Çarçani dhe lojtarin tonë Duro. Arbitrat u futën në dhomat e zhveshjes dhe nuk dolën më që aty”.