Akuza dhe prapaskena, Korabi hesht për largimin e donatorëve
Situatë kritike te dibranët, klubi nuk reagon
Humbja e radhës e ekipit të Korabit me një prej rivalëve në luftën për mbijetesë, ndaj Teutës, jo vetëm që e mban ekipin të shkëputur nga ndjekësit në vendin e fundit, por ka sjellë edhe një reagim të tifozëve dhe acarim të situatës. Tifozët dibranë në rrjetet sociale kanë kërkuar pas ndeshjes me durrsakët edhe dorëheqjen e drejtuesve të klubit dhe largimin e lojtarëve që kanë qenë pjesë e Laçit gjatë sezonit të kaluar. Lidhur me çështjen e përfolur të largimit të donatorëve Selim Rusi dhe Naim Agolli, gazeta ka tentuar gjatë ditës së djeshme të kontaktojë me drejtuesit e klubit, kryesisht me drejtorin Femi Mëziu, por një gjë e tillë ka qenë e pamundur, pasi drejtori ishte i padisponueshëm. Deri më tani, nga ana e klubit nuk ka ndonjë sqarim për këtë çështje, duke mos e mohuar dhe as pohuar atë çfarë kanë deklaruar tifozët se donatorët nga Amerika janë larguar. Siç dihet, deri para ndeshjes me Skënderbeun në klub ka pasur probleme financiare dhe ato kanë ndikuar edhe në largimin e trajnerit Artan Mërgjyshi. Por, pas ardhjes së trajnerit të ri Gerd Haxhiu, në konferencën për shtyp gjatë prezantimit të tij u tha nga drejtori sportiv Mëziu se klubi nuk ka probleme, por tashmë "bombën" e kanë lëshuar vetë tifozët dibranë, të cilët shprehen qartë se tashmë
Korabit i janë larguar financuesit e deritanishëm. Gjithsesi, nga zyrtarët e klubit nuk është konfirmuar ende ky lajm. Në faqen zyrtare të klubit dibran në lajmërimin e rezultatit final të ndeshjes ndaj Teutës, tifozët kanë shpërthyer në akuza dhe kritika ndaj stafit, lojtarëve dhe drejtuesve të klubit. Abdulla Dushku