Kampionati botëror, vetëm dy rekorde kombëtare

Edhe kampionati botëror i 13-të i të rriturve në Uindsor të Kanadasë (pishina 25-metërshe) rikonfirmoi diferencat e mëdha mes notarëve të Kombëtares shqiptare dhe kundërshtareve në bateritë respektive. Në ditën e parë të garave respektohen pritshmëritë për përfaqësimin e kuqezinjve, modestë në konkurrime. Ngushëllimi i vetëm i këtij konkurrimi të parë janë vetëm dy rekordet kombëtare të vendosura nga notarët, Kenet Libohova në garën e 100 m stil shpinë, dhe Deni Baholli, në 100 m stil bretkosë. Botërori nisi për shqiptarët me garën e 400 m stil i lirë. Franc Aleksi do të shënonte kohën 4:10.84 që do ta poziciononte të 67-tin në klasifikimin e përgjithshëm, kurse Frenc Berdaku e mbylli i 70-ti me kohën 4:15.84. Në total morën pjesë 72 notarë dhe kohën më të shpejtë në kualifikuese e regjistroi notari rus Aleksandër Krasniki 3:38.40. Në 200 m stil i lirë, Diana Basho realizoi kohën 2:17.40 (e 76-ta), ndërsa Alesia Neziri do ta mbyllte garën e 80ta me 2:24.83, mes 84 konkurrenteve. Më e shpejta në kualifikuese doli hungarezja Katinka Hozu me kohën 1:53.07. Në 50 m stil bretkosë, Kejsi Delli do të shënonte kohën e 56-të (38.65), mes 60 notareve. E para në këtë disiplinë në eliminatore doli xhamajkania Alia Atkinson me kohën 29.48. Kenet Libohova, në 100 m shpinë, vendosi rekord kombëtar me kohën 1.01.96 (i 62-ti mes 72 rivalëve). Përmirësim kohe në rang kombëtar regjistroi edhe Deni Baholli në 100 m bretkosë, përkatësisht 1:05.50 (i 79-ti mes 97 garuesve). Sakaq, Libohova do të ulte siparin e ditës së parë të Botërorit me 200 m stil i përzierë ku zuri vendin e 61 mes 67 rivalëve me kohën finale 2:17.62. Kohën më të shpejtë e regjistroi japonezi Daia Seto, 1:53.49.