Kupa, Kandreva shpëton Interin
Murijo “engjëll dhe djall”, pas golit spektakolar me roveshatë u dhuroi dy gola miqve
Ndonjëherë mjafton pak për t'u rikthy er te "zakoni" i vjetër. Skuadra që kishte zgjedhur Pioli për të kaluar pengesën Bolonja në Kupën e Italisë përmbushi objektivin me shumë vështirësi edhe pse në një moment të takimit krijoi një avantazh që vetëm ajo di si të mos e shfrytëzojë. Bolonja rikuperoi hendekun e krijuar nga Murijo dhe Palasio dhe u desh një gol i Kandrevës për të sistemuar gjithçka. Si për ironi të fatit, takimi i mbrëmshëm ishte "fotokopje" e atij që këto dy ekipe luajtën në sezonin e 20122013 të Kupës së Italisë. Edhe në atë ndeshje Interi "u vetëvra" duke shpërdoruar diferencën e dy golave të shënuar, por ndryshe nga tani në kohën shtesë do ta shpëtonte Ranokia...
Pas frikës - Takimin e djeshëm, tifozët zikaltër e kishin parë një herë. Ashtu siç ishin në dijeni për mbrojtjen e brishtë që ka skuadra e tyre e zemrës dhe për përgatitjen e dobët fizike të saj (në pjesën e dytë milanezët humbën shumë terren pasi ishin të lodhur). Duhej të ishte ndeshja e Gabigolit, por në çerekfinale i dërgoi Kandreva.
Gabigoli dhe mrekullia - Populli zikaltër priste shumë prej Gabigolit, i cili përveç disa goditjeve të dobëta dhe disa driblimeve nuk bëri asgjë tjetër. Pritshmërinë e lartë të tifozëve e justifikuan të tjerë lojtarë. Ata që askush nuk i priste. Në minutën e 34-t, Zhoao Mario ekzekutoi mjaft mirë një goditje këndi pasi gjeti në zonë, rreth 12 metra larg portës, Murijon, i cili me një roveshatë të plotë shënoi një "perlë". Da Kosta nuk mund të bënte dot asgjë përveçse të admironte gjestin perfekt teknik të mbrojtësit kolumbian.
Të zotë apo jo? - Ndeshja u duk se u vendos në harkun e pak minutave pasi në të 39ën Rodrigo Palasio nxori "nga cilindri" një tjetër gol të bukur ( për nga mënyra e ekzekutimit). Argjentinasi priti mirë kohën për t'u nisur dhe mori topin e saktë që i dha Zhoa Mario për të dërguar topin në rrjetë falë një diagonaleje perfekte. Pak minuta përpara se të mbyllej pjesa e parë, ishin po zikaltrit ata që menduan për ta "zbukuruar" takimin duke i dhënë mundësi Bolonjës që të gjente golin e shpresës pas një kundërsulmi elementar. Murijo dhe Medel gabuan shumë në mbrojtje, ndërsa Xhemaili mposhti Karrizon falë devijimit të Kondogbias. Kaq mjaftoi dhe Interi hyri në një krizë identiteti. Skuadrës së Piolit iu rikthyen makthet e së shkuarës dhe u lejoi
miqve që në fraksionin e dytë të arrinin avantazhin e shumëshpresuar. Goli i barazimit i skuadrës së Donadonit erdhi gjatë një goditje këndi ku Donsah nuk u markua prej askujt. Për t'i dhënë fund një ndeshjeje të tillë mendoi dyshja Ikardi-
Kandreva. Vetëm pak minuta pasi humbi një shans të pastër shënimi, argjentinasi u kthye në "assistman" duke gjetur Kandrevën të lirë në zonë. Mesfushori nuk u mendua dy herë dhe goditi topin që kaloi Da Kostën falë devijimit të një mbrojtësi mik.