"Reali bën kthesën ndaj Seltës, vuaj për formacionin"
Reali i Madridit do provojë të bëjë kthesën pas humbjes ndaj Sevijes, kur do presë sot në shtëpi Selta Vigon. Ndeshja e vlefshme për Kupën e Mbretit shihet si tepër e rëndësishme nga trajneri Zinedin Zidan, i cili i ka dalë në mbrojtje edhe Kejlor Navasit dhe Karim Benzemasë... Selta Vigo i ka fituar të katërta ndeshjet e vitit 2007. Ju shqetëson forma e tyre?
Nuk jam i surprizuar, pasi kanë një skuadër mjaft të mirë. Luftojnë në të gjitha kompeticionet që marrin pjesë dhe pres me të vërtetë një përballje të vështirë. Duhet të evitojmë gabimet, pasi bëhet fjalë për një fazë eliminuese.
Kohët e fundit ka pasur kritika për formën e treguar nga portieri Kejlor Navas...
Gjithnjë kërkohet maksimumi nga një portier apo një futbollist, por janë qenie njerëzore. Personalisht, jam i lumtur për Navasin. Kishim 40 ndeshje radhazi pa humbje dhe në portë ka qenë Kejlor. Asnjë tjetër. Pra, ai është një nga arsyet pse nuk u mposhtëm. Do bëni rrotacion në Kupë? Nuk e di. Kemi shumë ndeshje dhe deri në fund të marsit do luajmë çdo tri ditë. Do kemi nevojë për të gjithë, ndaj duhet të jemi të kujdesshëm në menaxhimin e formës së tyre. Na mungojnë edhe Pepe, Koentrao dhe Bejl. Gjithsesi lojtarët janë duke u rikthyer me kalimin e kohës dhe po mundohemi të kemi një grup sa më të kompletuar. Sinqerisht, më duhet të mendoj shumë për të zgjedhur në fund ata që do luajnë nga minuta e parë.
Do jetë Kristiano në formacion?
Do e shikojmë para ndeshjes. Ka mendime të ndryshme nëse ai duhet të luajë apo jo në kompeticione si Kupa e Mbretit.
Ka pasur ndonjë ndryshim negativ në psikologjinë e lojtarëve pas humbjes ndaj Sevijes?
Aspak. Ne jemi profesionistë dhe i dimë detyrat tona. Kishim 40 ndeshje pa humbur dhe ajo nuk mund të zgjaste përjetësisht. Në futboll ndodh edhe që të mos marrësh atë që meriton në fushën e lojës, pasi ke qenë i pafat. Unë shikoj një ekip të motivuar maksimalisht, me një dëshirë të madhe për të fituar gjithçka sivjet. Kjo më jep qetësinë që në fushën e lojës do kem 11 futbollistë që do japin gjithçka.
A i meriton Benzema kritikat?
Ai është një sulmues i shkëlqyer, aq sa vihet në qendër të kritikave po humbi një top në mesin e fushës. Sinqerisht, janë gjëra të padëmshme, pasi ndonjëherë më duken qesharake.