Përgatitje taktike, formacioni i derbit drejt kristalizimit

Përgatitjet e djeshme të Partizanit kanë vijuar sërish në kompleksin "Tirana Internacional" në Pezë, por në një orar disi më të vonë se seancat e tjera, në orën 15:00. Seanca e djeshme ka qenë kryesisht e karakterit tekniko-taktik, ku trajneri Starova ka aplikuar disa skema loje, reshtim në fushë, si dhe praktikumin e goditjeve standarde. Në seancat e fundit, trajneri Sulejman Starova është mundur me të gjitha mënyrat që ta fshehë formacionin, duke aplikuar ndeshje brenda grupit, ku nuk kanë munguar as eksperimentet. Por, gjatë ditës së djeshme janë vënë re në fushë shenjat e kristalizimit të formacionit anti-Tirana. Ndryshimet pritet të jenë prezente edhe në këtë javë në rreshtimin e të kuqve. Me shumë mundësi, Atanda do të paguajë gabimet që bëri në ndeshjen e fundit në Durrës dhe derbin pritet ta nisë nga stoli. Me atë që është praktikuar dje, Lorenc Trashi pritet të luajë si mbrojtës i majtë në vend të Kalarit, ndërsa Fejzullahu në të djathtë të mbrojtjes. Para tyre mund të rreshtohet Ylber Ramadani dhe më pas pritet të veprojë dyshja Batha- Vila. Mentor Mazrekaj dhe Agustin Torasa pritet që të rreshtohen në krahë duke mbështetur Ekubanin në majë të sulmit. Nëse të enjten dhe të premten u dha ideja se Sukaj mund të luante si regjisor, me atë që është aplikuar në seancën e djeshme pritet që bomberi shkodran dhe Marko Cetkoviç ta nisin nga stoli derbin e nesërm. Të dy këta lojtarë pritet që të angazhohen në pjesën e dytë, në mënyrë që ekipi të ketë më shumë agresivitet në fazën sulmuese, aq më shumë nëse kërkohet zhbllokimi i rezultatit. Pra, duket qartë që trajneri Starova po mendon një ekip që di të bëjë presing nga krahët, ku priten vertikalizimet e Trashit dhe Fejzullahut. Ndërsa Ramadani, Batha dhe Vila pritet të jenë diga e të kuqve për bardheblutë në mesfushë.