Duro sfidon në debutim projektuesin e Flamurtarit
Trajneri: Teuta e fortë, duam vetëm fitoren
Shpëtim Duro do të debutojë sot në pankinën e Flamurtarit dhe si për koincidencë përballë do të ketë trajnerin që ka projektuar skuadrën vlonjate në fillimin e këtij sezoni, pikërisht Gugash Maganin. Sot ky i fundit është në pankinën e Teutës, ndërsa Duro ka marrë drejtimin e Flamurtarit dhe do të kërkojë tri pikët e para. Sipas të gjitha gjasave, ndryshimi i parë i trajnerit të ri do të nisë nga porta, teksa Frashëri pritet të ulet në stol, ndërsa titullar do të rikthehet Halili. Nga ana tjetër, një lojtar i preferuar për Duron është i riu Beqja, që do të rikthehet në formacion dhe mendohet që serbi Jakovlejviç të spostohet në qendër të mbrojtjes. "Me Teutën është një ndeshje shumë e rëndësishme, por për Flamurtarin deri në fund të gjitha janë decizive. Situata e ekipit është e tillë që unë kam vetëm dy ditë që kam bërë stërvitjen e parë. Ka probleme në ekip, pasi ka futbollistë prej kohësh të dëmtuar. Do të shikojmë edhe gjendjen e Bushiç, që shton edhe më shumë problemet. Për ndeshjen me Teutën jam fokusuar te futbollistët që janë 100% të gatshëm për këtë takim. Durrsakët kanë një ekip shumë kompakt, që kanë kohë që luajnë bashkë dhe vijnë me moralin e kalimit në gjysmëfinalen e Kupës së Shqipërisë. Situatat janë të njëjta, por unë them
se Flamurtari ka skuadër, ka lojtarë të mirë dhe do të bëjmë të pamundurën për fitore. Teutën e kemi kundërshtar direkt dhe fitorja do të ishte një rezultat shumë pozitiv", ka thënë Duro. Trajneri i ri i Flamurtarit ka edhe një mesazh për tifozët. "Në këto momente të vështira të Flamurtarit, përkrahja
e tifozëve është shumë vendimtare. E rëndësishme është që tifozët të vijnë në stadium të përkrahim Flamurtarin. Për ne primare është mbijetesa në Superiore, pasi janë 4-5 skuadra që rivalizojnë, por të shpresojmë deri në fund", përfundon kreu i pankinës kuqezi. Ermal Sika