Apolonia zhyt Elbasanin në fund, rikthim me tripletë
Fierakët fitojnë edhe me 10 lojtarë, sulmi në formë
Apolonia merr fi toren e parë për 2017- ën, ndërsa verdheblutë zhyten të fundit në Grupin B, pas përballjes së djeshme në "Elbasan Arena" midis Elbasanit dhe Apolonisë, ku fierakët fituan në shifrat 1-3. Në një lojë të fortë, me shumë kartonë të verdhë, një të kuq dhe dy penallti, në fund dolën të gëzuar fierakët. Nga ana tjetër, edhe pse verdheblutë luajtën një pjesë loje me një lojtar më shumë, nuk ia dolën të merrnin pikë shprese për mbijetesën.
Ndeshja
Minutat e para të lojës janë vendësit ata që marrin nën kontroll topin dhe ushtrojnë presion në fushën kundërshtare. Nga ana tjetër, Apolonia mbrohet mirë dhe aplikon më shumë kundërsulmin. Kështu ndodh, teksa në minutën e 20të Mustafaraj, i harruar në zonë, kontrollon topin dhe godet me sferën që devijohet lehtë, aq sa për të neutralizuar Kotorrin dhe ndalet në rrjetë. Megjithatë, atëherë kur pritej mbyllja e pjesës së parë, në minutën e tretë shtesë, Toçi pengohet nga portieri mik dhe ka penallti. Përpos protestave të shumta nga ana e miqve, Toçi merr përsipër goditjen nga pika e bardhë dhe barazon shifrat. Në të dytën, Dosti freskon sulmin me Zisin dhe Peqinin, ndërkohë që Mehmeti dy minuta nga fillimi i lojës lë fierakët me një lojtar më pak në fushë, pas të verdhës së dytë. U duk se në superioritet numerik verdheblutë do të tentonin më shumë, por Apolonia mbledh forcat dhe mbahet. Në të 67-ën, fierakët fitojnë një 11-metërsh, i cili shndërrohet në gol nga ana e Uzunit. Verdheblutë bëjnë përpjekje të dëshpëruara, por në minutat shtesë është Krasniqi ai që vulos fitoren për miqtë.