Turbina lë fundin, Tomori mbetet në krizë

Turbina ka triumfuar me një rezultat të pastër 2-0 në përballjen e djeshme ndaj Tomorit. Cërrikasit mposhtën me meritë ekipin beratas, në një ndeshje që e kishin cilësuar si "jetë a vdekje". Formacioni i trajnerit Sinan Bardhi ka dalë fitimtar nga stadiumi "Nexhip Trungu" dhe ka lënë vendin e fundit në Grupin B duke u ngjitur në të 9in. Nga ana tjetër, beratasit janë zyrtarisht në krizë ku në tre takimet e para në këtë vit kanë marrë vetëm një fitore dhe tashmë do t'u duhet të luftojnë fort në dy takimet e mbetura të fazës së dytë për të qenë në 5-shen e parë.

Ndeshja

Takimi ka nisur i ekuilibruar, ndonëse pritshmëritë e sportdashësve cërrikas, të cilët hynë falas në stadium, ishin të larta. Në minutat e para, Agastra për pak sa nuk ka befasuar Turbinën. Vendësit intensifikojnë përpjekjet drejt sulmit, edhe pse pa rrezikshmëri. Gjithsesi, falë kësaj këmbëngulje, mbrojtësi Bruno Lipi arrin t'i kalojë cërrikasit në avantazh në minutën e 28- të falë një goditje potente brenda zonës. Djemtë e trajnerit Stojku tentojnë të reagojnë, por prapavija cërrikase është vigjilente. Në fraksionin e dytë të lojës, beratasit përpiqen të vendosin ekuilibrat, por pa rezultat. Turbina e administron mirë lojën, madje shfaqet rrezikshëm edhe në kundërsulm. Sallaku, falë një zbritjeje të shpejtë, pengohet brenda zonës dhe kryesori akordon 11-metërsh. Kapiteni Klevis Roshi e shndërron në gol këtë penallti vetëm dy minuta nga fundi i krejt takimit. Sportdashësit cërrikas janë në delir dhe duket se tashmë me këtë episod vuloset kjo fitore bindëse që e largon Turbinën nga vendi i fundit i klasifikimit. Florenc Manari