Rikthehet Boci, Kamza për trepikësh në Krujë

Kamza do të luajë sot ndoshta një nga ndeshjet më të rëndësishme të këtij sezoni, ndaj Besëlidhjes, rivali kryesor në garën për ngjitjen në Superiore. Edhe pse diferenca prej 10 pikësh i jep qetësinë skuadrës së drejtuar nga Devolli, një fitore sot ndaj lezhjanëve në stadiumin e Krujës mund të shuajë përfundimisht shpresat e tyre për ngjitjen. Në një ndeshje kaq delikate për kamzalinjtë, rikthimi i mbrojtësit shkodran Arlis Boci është një plus më shumë. Në një prononcim për "Panorama Sport", Boci ka vlerësuar kundërshtarin e radhës, megjithatë beson te suksesi i ekipit të tij. "Kamza është një skuadër me lojtarë mjaft cilësorë dhe nuk ka aspak rëndësi se kush është në fushë, pasi ro- let janë të dubluara në mënyrën më të mirë. Objektivi ynë kryesor është që të ngjitemi në Superiore dhe në detyra kryesore është që të fitojmë në ndeshjen ndaj Besëlidhjes në Krujë. E dimë që luajmë një nga ndeshjet më të vështi- ra, megjithatë nuk duhet ta vëmë asnjëherë në diskutim trepikëshin. Siç dihet, skuadra lezhjane është për t'u vlerësuar në maksimum dhe meriton respektin tonë, ndaj jemi stërvitur me ritëm të lartë gjatë gjithë javës me synimin e vetëm që të dalim triumfues nga fusha e blertë. Duhet që të thellojmë diferencën me kundërshtarin dhe të ecim të qetë drejt ngjitjes në Superiore", ka mbyllur Boci. Duke parë afërsinë e Kamzës me Krujën, pritet që në mbështetje të skuadrës së drejtuar nga Devolli të ketë një numër të lartë tifozësh që presin të shohin suksesin e radhës të ekipit të tyre. Abdulla Dushku