Qitja rikonfirmon Stefan Rrufën si president

Federatat shumësportëshe vijojnë me zgjedhjet e forumeve të reja drejtuese. E radhës ka qenë Federata Shqiptare e Qitjes, e cila në Asamblenë Zgjedhore të zhvilluar paraditen e djeshme në qytetin e Durrësit ka votëbesuar presidentin dhe kryesinë e re. Edhe për katër vitet e ardhshme Stefan Rrufa do të mbajë funksionin e presidentit të Federatës. Për Rrufën ky do të jetë mandati i tij i katërt në krye të qitjes shqiptare. Në përfundim të votimit, Rrufa, i vetëm si kandidat doli fitues në unanimitet nga të mandatuarit. Në proces morën pjesë klubet e licencuara në federatë, respektivisht Tomorri Qitje Sportive, Elbasani, Shoqata Pjateli Durrsak, klubi shumësportësh Puka, klubi Tirana, Klubi Studenti, Tomorri Pjatel, klubi Flamurtari dhe Shoqata Erzeni. Përpos votëbesimit të kandidaturës Rrufa për titullarin e federatës, klubet votuan edhe për kryesinë e re, së cilës i besuan Abedin Kovaçi, Besnik Gjevori, Dhimitraq Tirka, Shpëtim Hadroj, Auron Lani dhe Shpëtim Bishtika. Në një prononcim për gazetën "Panorama Sport", presidenti Rrufa u shpreh se projekti më i rëndësishëm për këtë mandat do të jetë ndërtimi i një poligoni për qitjen me pjatel. Sakaq, kandidatura për sekretarin e përgjithshëm do të jetë ajo aktuale e Koço Mikerezit. Sipas presidentit Rrufa, sekretari do të rikonfirmohet nga kryesia e re në mbledhjen që do zhvillohet javën tjetër. Me statut të federatës, kandidati propozohet nga presidenti dhe aprovohet nga Kryesia. Ndërkohë, gara e ardhshme në vend do të jetë një takim kombëtar më 18 mars. Asambleja Zgjedhore u monitorua nga drejtori i Sportit në Ministrinë e Arsimit dhe Sportit, Vladimir Gjonaj dhe presidenti i Komitetit Olimpik Kombëtar Shqiptar, Viron Bezhani.