Alegri-Bonuçi u përplasën në tunel
Leonardo u acarua aq shumë, sa vrapoi në dhomat e zhveshjes pa përshëndetur tifozët
Masimiliano Alegri tani e në vazhdim nuk do të tolerojë më askënd, ndonëse edhe njëherë tjetër ai u mundua që t'i mbrojë, kundrejt sulmeve të medias, lojtarët e tij. Pas dorës së mohuar nga Dibala dhe shfryrjes së Lihshtajnerit për të mos dalë nga fusha, kundër Palermos debati i radhës ishte me Leonardo Bonuçin, madje shumë i ashpër. Trajneri i kërkonte mbrojtësit që të ishte më i kujdesshëm, duke qenë se Markizio ishte i kontraktuar, por edhe Pjaca e Sturaro, por pas pësimit të golit, edhe pse rezultati 4- 1, "Konti Maks" shpërtheu duke shpenzuar edhe disa ofendime në dëm të lojtarit, i cili nuk i mirëpriti, përkundrazi iu kthye me të njëjtën gjuhë. Situata u acarua edhe më shumë pas vërshëllimës, sepse nëse Alegri hyri në tunel duke folur me veten i nervozuar, Bonuçi nuk vrapoi me shokët e tjerë për të përshëndetur tifozët, siç e do rituali i përhershëm, por me shumë shpejtësi u fut në tunel, për të folur me trajnerin e tij. Siç
raportoi media e pranishme në dhomat e zhveshjes, debati mes të dyve ishte mjaft i ashpër, ndonëse ai mund të ketë qenë i lidhur edhe nga tensioni i sfidës, por duhet theksuar se të tilla rebelime ndaj trajnerit po nisin të bëhen të shpeshta. Gjithsesi, përpara kamerave, livornezi 49-vjeçar e dribloi bukur situatën: "Në fillim Dibala,
pastaj Lishtajneri dhe tani me Bonuçin... Nuk po them që këto janë gjëra madhore, por mungesa e respektit është çështje edukate, ndonëse unë jam i bindur se të tilla reagime kanë ardhur nga tensioni që lojtarët e mi kanë nga ndeshja. Ndoshta Bonuçi kërkon të bëjë edhe trajnerin, por është herët për të qenë më i zoti sesa unë".