Ngec Siti, Çelsi nuk fal as në Kupë

Uolverhemptonin e eliminojnë golat e Pedros dhe Diego Kostës

Mirë se vini në FA Cup, atje ku gjithçka mund të ndodhë. Bukuria e këtij kompeticioni është e pamohueshme. Sepse pas mrekullisë së Linkolnit dhe Milluollit, në një pasdite në Uest Jorkshajër, Hadërsfilldi, formacioni që mban vendin e tretë në Championship, bllokon në një 0-0 skuadrën e dytë të Premier Ligës, Mançester Sitin. 25 mijë spektatorët e "John Smith Stadium" shijojnë barazimin e merituar. Verdikti shtyhet për në "Etihad" dhe çerekfinalet mbeten në dorën e tyre, por Guardiolës nuk i ka pëlqyer aspak një ndeshje më shumë me Champions-in në prag (sfidojnë Monakon të martën). Të zotët e shtëpisë e nisën me ritëm dhe agresivitet, por është Navas ai që mund t'i ndëshkojë: kapiteni Hadson shpëton në vijën fatale. Aguero tenton parabolën të pamundur, pastaj është skuadra e Vagnerit që i afrohet golit: nga zhvillimet e një goditje këndi, Billing dërgon në rrjetë, por festa shuhet menjëherë, sepse është pozicion jashtë loje. Nolito godet fluturimthi, por gjen vetëm një devijim, ndërsa Van La Parra tenton të surprizojë Bravon. Aguero, i vetëm përballë Kolmanit, sepse i shpëtoi pozicionit jashtë loje, shpërdoron një shans. Në pjesën e dytë, argjentinasi tenton me një të djathtë nga jashtë zone. Por Siti nuk arrin të zhbllokohet dhe detyrohet të shkojë në "replay".

Nuk fal Çelsi - Sa u përket bluve të Londrës, u takon pikërisht atyre për të prerë biletën e fundit të çerekfinaleve të ditës së shtunë. Skuadra e Kontes ia del pasi u bllokua 0-0 në pjesën e parë nga Uolverhemptoni, skuadrës së Pol Lambertit, që këtë sezon kishte eliminuar Liverpulin nga FA Cup. Në "Molineux" flitet spanjisht: zhbllokon Pedro dhe dyfishin Diego Kosta që rimerr veten pas një goditje në kokë dhe disa çaste ankthi, por edhe nga shterpësia e tij përpara porte: prish agjërimin pas 413 minutave. Nga portieri rezervë, pa mbrojtjen titullare dhe mesfushën, Çelsit i urohet mirëseardhja nga ish- i Xhorxh Sevill, e majta e të cilit stampohet në shtyllë në minutën e katërt. Vendësit

dominojnë të paktën për gjysmë ore linjën mbrojtëse me kapitenin Beth dhe tentojnë të godasin në kundërsulm me Sevill. Por, në pjesën e dytë, skuadra e Kontes ndërron marsh dhe pasi Kosta tremb vendësit, blutë kalojnë në avantazh në 65' kur Pedro mposht me kokë Ikemen pas asistit në vend nga Uillian. Ky i fundit dhe Fabregas shpërdorojnë golin e sigurisë, i cili vjen në minutën e 89-të me një vertikale të Kostës. Skuadra e "ujqërve" nuk arrin ta vërë në vështirësi Begoviçin, por largohet nga Kupa me kokën lart.