Lazeri “makth” për Likën, tension në korridore
Thyhen sërish stola, Starova dhe Josa përqafim pas derbit
Përtej spektaklit që u dhurua në fushë, jashtë saj nuk munguan çudirat. Gjithçka nisi me një kaos në sektorin e mediave, ku më të shumtë ishin kryepolicët dhe skautët se sa gazetarët. Tension në korridore, por edhe përqafime. Fundi i ndeshjes nxjerr fitues "Bobin", e megjithatë Josa nuk mund të mos e përgëzonte dhe jepte një përqafim miqësor kolegut të tij.
- Starova dhe Josa, përqafim miqësor pas konferencës. Trajnerët "harruan" rezultatin final dhe nuk ngurruan që të uronin njëri-tjetrin.
- "Bobi", pas 90 minutave plot presion, pasi doli nga stadiumi, gjeti një moment për të konsumuar një cigare.
- Derbi nuk i ndan miqtë. Erando Karabeci dhe Renaldo Kalari u panë bashkë afro 30 minuta para se të niste derbi. Madje, mes tyre ishte edhe babai i mbrojtësit të Partizanit, i cili ishte në krye të detyrës, me uniformën e policit.
- Në momentin që lojtarët e Tiranës dolën në nxehmje, tifozët e kuq nisën të vërshëllenin. Dhe, si kurrë më parë, bardheblutë këtë herë nuk patën përkrahjen e ultrasve të tyre.
- Sektori i mediave u bë lëmsh dje, aq sa numri i gazetarëve ishte realisht i vogël. Nuk mungoi askush, madje prezent ishte edhe drejtori i përgjithshëm i Policisë së Shtetit, Haki Çako. Por, veç tij, ishin edhe disa lektorë të kursit të UEFA-s.
- Sa shumë menaxherë në derbi! I pranishëm ishte menaxheri italian i Kaleb Ekubanit. Por jo vetëm, pasi prezent ishte edhe një skaut i Slovan Bratislavës. Ai kishte ardhur për të parë Realdo Filin, por nuk mundi dot, pasi fieraku nuk mori asnjë minutë dje. Megjithatë, ai përfitoi që të mbante shënime pafund për Kaleb Ekubanin.
- Labinot Ibrahimi kishte një tifoze speciale dje në stadium. Vajza e tij 1- vjeçare duket se i ka sjellë fat Partizanit, paçka se vetë kosovari mori shumë pak minuta në këtë derbi.
- Lazeri u kthye në një shqetësim serioz për Ilion Likën. Për 90 minuta, tifozët e Partizanit e kanë "masakruar", e megjithatë, përtej dy golave të pësuar, portieri u bë shpëtimtar në disa raste.
- Edhe ky derbi nuk kaloi pa dëme, ndërsa si gjithnjë pasojat i vuan... stadiumi. Pati disa stola të thyer. Nga Partizani pretendojnë se ishin 10, ndërsa nga Tirana nuk janë nxituar, ndërsa vetëm sot do të nxjerrin bilancin e saktë. Gjithsesi, drejtuesit e kuq kanë dalë garant që do të paguajnë për çdo poltronë të dëmtuar.
- Policët dhe punonjësit e sigurisë private nuk njohin futbollistët. Edhe pse të veshur me uniformë zyrtare të klubeve, ata janë lënë 10 minuta jashtë.
- Tension në korridore. Përgjegjësi i marrëdhënieve me mediat nuk është lënë që të futet në dhomat e zhveshjes së Tiranës. Pati nerva, e megjithatë pak minuta më vonë gjithçka u qetësua.
- Gentjan Muça u fut në fushë me fanellë ndryshe. Mbi uniformën zyrtare të Tiranës, ai kishte veshur bluzën e "Tirona Fanatics", duke u dhënë një mesazh dashurie në distancë ultrasve bardheblu.
- Sa shumë motorë dhe biçikleta pas portave. Ai sektor ishte kthyer në një miniparking për forcat e rendit, të cilët kishin marrë me vete edhe mjetet e transportit.
- Sodiq Atanda, Kristi Marku, Ardit Jaupaj, Jurgen Vatnikaj ishin në tribunën B dje, sakaq Xhevahir Sukaj e ndoqi në atë VIP. Në krahun tjetër, në sektorin A, ishin lojtarët e Tiranës që munguan në derbi, si: Dorian Kërçiku, Erando Karabeci, David Domgjoni, Flamur Bajrami, Romuald Ntsitsigui dhe Ifeani Edeh.
- Mirel Josa u revoltua në të 14- ën minutë, ndërsa u ankua tek anësori Doda për një rivënie anësore, e cila iu dha Partizanit. Ndërsa në të 56-ën, pas një ndërhyrjeje të gabuar të Malotës, trajneri shkoi t'i kërkonte llogari arbitrit të katërt.
- Starova acarohet në të 26ën me Vilën, për një top të gjuajtur gabim.
- Sa shumë "trajnerë" në
tribunën qendrore të Partizanit. Të gjithë tifozët jepnin direktiva, duke e kaluar edhe cakun. Madje, në të 59- ën dikush iu ankua Starovës për aktivizimin e Kalarit, megjithatë përgjigjja e "Bobit" nuk mungon, ndërsa i tha: "Ik, më lër rehat".
- Reklamat u "masakruan" dje. Çdo top që drejtohej tek ato, bënte që të përfundonin në tokë. Madje, edhe në momentin që Olsi Teqja shkoi për të festuar golin, ranë dy të tilla. Mbrojtësi u ngatërrua, pasi fillimisht mendoi që të festonte te tifozët. Por më pas shkoi te "Ultras Guerrils", duke i provokuar dhe bërë me shenjë të pushonin.
- Korado Sakone, përgatitësi atletik i Partizanit, është marrë gjatë pushimit të ndeshjes posaçërisht me Renaldo Kalarin. Ai e udhëzoi për disa minuta, duke qenë se mbrojtësi ishte edhe ndërrimi i parë që u bë te të kuqtë.
- E 51-ta minutë solli ndërprerje të lojës, pas hedhjes së disa sendeve të forta në fushë. Pasi u larguan, rifilloi edhe ndeshja.
- Ishte e 87-ta minutë kur Gentjan Muça u drejtua nga pankina dhe kërkoi ndërrimin e Teqjes së dëmtuar, ndërsa largimi i tij nga fusha erdhi pas pak sekondash.
- Merveil Ndokyt largohet nga stadiumi me këmbën e fashuar. Lojtari mori një goditje në fushë, megjithatë vetëm sot do të konfirmohet gjendja e tij.
- Vonesa e Agustin Torasës acaron Erjon Hoxhallarin. Mbrojtësi i kërkon që të nxitojë, madje edhe e shtyu kur argjentinasi u ndërrua me Ibrahimin.