Rilindja e Bregut dhe... Selmani
Bruno Lulaj bëri liderin te Laçi, ndërsa Nazmi Gripshi u peshkua nga Skënderbeu për 60 mijë €
Një sezon më parë iu desh të rivalizonte me Mirosllav Vujadinoviç, por ia doli duke e "përzënë" malazezin nga Laçi. Bëhet fjalë për Gentian Selmanin, 18-vjeçari që prej një viti po mbron portën kurbinase. Ky është sezoni i konfirmimit për të riun, që gjithnjë e më tepër po bëhet i rëndësishëm për bardhezinjtë. Sezoni 2016- 2017 mund të quhet pa frikë edhe si ai që ka rilinduar disa talente, që pak vite më parë shpërthyen dhe më pas për një kohë jo të vogël u harruan. Shembulli konkret është ai i vlonjatit Dejvi Bregu, 21-vjeçari që në kampionatin e sezonit 2014-2015 shkëlqeu me Flamurtarin, por më pas u braktis nga drejtuesit e klubit. Në janar të vitit 2016, një telefonatë e presidentit të Luftëtarit, Grigor Tavo, bindi shtatshkurtrin që të zgjidhte gjirokastritët, të cilët militonin në Kategorinë e Parë. U rikthye në Superiore me Luftëtarin dhe tashmë është bërë lojtari i momentit. Ka shënuar 5 gola në 20 ndeshje të luajtura në kampionat, ndërsa klubi gjirokastrit e ka blinduar me një kontratë 3-vjeçare. Tashmë Luftëtari kërkon jo më pak se 200 mijë euro për kartonin e tij. Një tjetër lojtar që kishte dy sezone që aktivizohej me pikatore ishte Nazmi Gripshi, i zbuluar nga Gugash Magani te Teuta. Në këtë kampionat luajti thuajse gjithë pjesën e parë të sezonit si titullar dhe në merkaton e janarit u peshkua nga Skënderbeu. 19-vjeçari u ble për 60 mijë euro nga klubi korçar, ndërsa në rast rishitje në një ekip jashtë Shqipërisë, 30% të vlerës së kartonit do ta përfitojë Teuta.
Të tjerët - Një qendërmbrojtës goleador. Bruno Lulaj u huazua nga Skënderbeu te Laçi
dhe në pak kohë u bë pjesë e padiskutueshme e formacionit kurbinas. Ka shënuar dy herë dhe u ka dhënë 4 pikë bardhezinjve këtë kampionat. Skënderbeu kërkoi ta rikthente në janar, madje kreu edhe fazën përgatitore me kampionët, por sërish mbeti në Laç. Një tjetër mbrojtës,
por që preferon të luajë nga krahët dhe që këtë sezon po konfirmohet si talent është 18-vjeçari Arbri Beqaj. Në sezonin e kaluar ishte Gentian Mezani që e aktivizoi për herë të parë, ndërsa tashmë pëlqehet shumë edhe nga trajneri i ri, Shpëtim Duro. Edhe në kryeqytet po konfirmohet
një talent, edhe pse është paragjykuar jo pak, pasi është djali i presidentit të Tiranës. Bëhet fjalë për Grent Halilin, i cili ka të dhëna premtuese për të qenë sulmuesi kryesor i bardhebluve. Në këtë kampionat është aktivizuar më shumë. Ndërkohë, në formacionin e
konfirmimeve zë vend edhe mesfushori me tipare shkatërruese, Behar Ramadani. Pasi kishte provuar katër vite më parë të luante në Superiore me Luftëtarin, duket se sezoni ideal për të shpërthyer ishte ky aktuali. Lojtari shkodran është 26 vjeç dhe më shumë ka luajtur
në Kategorinë e Parë, por me pjekurinë e fituar po bën një paraqitje të jashtëzakonshme me skuadrën gjirokastrite. Një kampionat të mirë po bëjnë edhe emra si Denis Pjeshka te Vllaznia, por gjithashtu Drilon Musaj e Regi Lushkja, që janë pjesë e Laçit.