Gjoka: Kemi sulmin më të mirë, i japim goditje Partizanit

Pero Pejiç dhe Izair Emini kanë shënuar 20 nga 27 golat e Kukësit në këtë edicion të Kategorisë Superiore. Ndaj nuk është aspak çudi që trajneri Ernest Gjoka u beson shumë sulmuesve të tij se do të dinë të zgjidhin edhe sfidën kundër Partizanit në fundjavë. Tekniku ka bindjen e plotë se ka në duar sulmin më të mirë në kampionat dhe, pavarësisht formës që po kalon Kaleb Ekuban i Partizanit (10 gola në kampionat), mendon se sulmuesi i ekipit kryeqytetas nuk arrin në nivelin e Pejiçit dhe Eminit. "Sulmin më të frikshëm të kampionatit shqiptar e ka Kukësi. Ekubani dhe emrat e tjerë vijnë mbrapa nesh. Duke respektuar radhën, mendoj që sulmi i frikshëm është i Kukësit dhe pastaj do të shohim për pjesën tjetër të vazhdimësisë", deklaroi sot Gjoka për "SuperSport". Dueli me Partizanin është vendimtar për ecurinë e mëtejshme të verilindorëve dhe Gjoka e di mirë që një duel i tillë ka pak alternativa. "Këto janë ndeshje ku alternativa e vetme është ose e bëjmë… ose e bëjmë: Nuk ka mënyrë tjetër. Edhe këtë javë me Partizanin duhet ta kalojmë në avantazhin tonë, për të mbajtur vendin e parë dhe, pse jo, për t'i dhënë një goditje kundërshtarit tonë direkt. Mendoj se do të jetë një betejë e madhe si psikologjike, ashtu edhe tekniko-taktike", vijoi ai. "Nëse themi që ky Kukës ka rezultate pozitive, kjo nuk është e rastësishme. Gjithçka vjen nga lufta, sakrifica dhe shpirti i garës që kemi treguar javë pas jave. Çfarë duhet të bëjmë ekstra? Këto janë sekrete profesionale dhe duhet t'i themi me kujdes, por duhet të mbajë ritmin që kemi mbajtur në dy fazat e para ndaj një kundërshtari direkt si Partizani. Nëse e bëjmë këtë, atëherë mund të themi që jemi aty ku duhet", mbylli trajneri i Kukësit.