Hoxha e Malota, me probleme
Kapiteni dhe mbrojtësi përgatitje të diferencuar, tentohet rikuperimi
Pas triumfit në derbin e 148-të të kryeqytetit, vëmendja e Partizanit është përqendruar te transferta e Kukësit, takim i cili konsiderohet si prova e së vërtetës për objektivat e të kuqve. Java përgatitore për këtë takim nuk ka nisur mbarë për trajnerin Starova, pasi gjatë seancës së djeshme dy nga titullarët e derbit janë përgatitur të diferencuar duke sjellë njëfarë shqetësimi te stafi teknik. Kapiteni Alban Hoxha dhe mbrojtësi Renato Malota janë përgatitur të diferencuar nga grupi. Gjatë derbit, portieri Hoxha ka pësuar një lëndim në gju dhe për këtë shkak, ai dje ka kryer vetëm disa vrapime të lehta, si dhe ka qenë nën përkujdesin e stafit mjekësor. Me pasoja nga derbi ka dalë edhe mbrojtësi Renato Malota, i cili mësohet se ka pësuar një zgjatje muskujsh rrëzë kofshës. Të dy lojtarët u janë nënshtruar ekzaminimeve të hollësishme dhe ka rezultuar se dëmtimet e tyre nuk janë problematike, në mënyrë që privohen nga transferta e Kukësit. Madje, në fund të përgatitjeve të djeshme, mbrojtësi Renato Malota ka pohuar se dëmtimi i tij nuk është problematik, kështu që sot ai do t'i bashkohet grupit dhe është i bindur se do të jetë gati për dielën, ku në Kukës ai shkon me statusin e ishkapitenit. Ky takim është shumë i veçantë për Malotën,
ndaj ai dëshiron që ta humbasë sfidën ndaj ish-skuadrës kuksiane, me të cilën në sezonin e fundit ngriti trofeun e Kupës së Shqipërisë. Pjesa tjetër e ekipit ka treguar gjatë seancës së djeshme se gëzon formë të mirë dhe shpresohet që suksesi i derbit të pasohet
nga java në javë. Seanca e djeshme e të kuqve ka rezultuar e karakterit tekniko-taktik. Edhe gjatë përgatitjeve të djeshme, përgatitësi atletik i ka shtrydhur mirë lojtarët, nga të cilët gjithnjë kërkon shpejtësi dhe saktësi në ekzekutimin e ushtrimeve.