Mutumane tregon Gjirokastrën, nga i ftohti te qëndrimi në Superiore
Usama Mutumane është një nga dy futbollistët e huaj të afruar në merkaton e janarit te Luftëtari dhe së bashku me Pedro Bengui e çon në katër numrin e lojtarëve joshqiptarë në ekip. Edhe pse u bë pjesë e bluzinjve në limitet e meraktos, Mutumane në prezantimin që bëri me fanellën e Luftëtarit në transfertën korçare tregoi cilësi dhe shpirt të lartë gare. Në prononcimin e parë për "Panorama Sport", mozambikasi ka bërë të ditur gjithçka që ka përjetuar në këto ditë të para pranë Luftëtarit. "Gjirokastra është qytet i mirë dhe i qetë. Njerëzit më pëlqejnë dhe janë të dashur. Ndihem mirë dhe mendoj se jam përshtatur, pavarësisht se kam pak ditë që jetoj me zhurmën e këtij qyteti të bukur. Gjithçka është mirë deri më tani. Kur erdha ditën e parë këtu (në Gjirokastër) kisha ftohtë, por me kalimin e ditëve po ambientohem", tha fillimisht Mutumane. Humbja 3- 0 e Luftëtarit me Skënderbeun nuk ka lënë shije të mirë te mesfushori mozambikas, pasi loja nuk përligjet me rezultatin. "Ndaj Skënderbeut ishte ndeshja e parë me fanellën e Luftëtarit, për të cilën mendoj se kemi luajtur mirë. Ekipi u paraqit shumë mirë, ndaj mendoj se rezultati nuk ishte i drejtë. Ne do të vazhdojmë punën për të arritur objektivin tonë. Personalisht besoj se bëra një paraqitje të mirë, edhe pse ishte prezantimi im i parë me fanellën e Luftëtarit. Më duhet që ditë pas dite të tregoj veten dhe të punoj fortë për t'u përmirësuar më shumë. Objektivi i Luftëtarit, qëndrimi në Kategorinë Superiore, mbetet pa dyshim prioritet i drejtuesve të klubit, marrë shkas nga lufta e egër sportive brenda dhjetë ekipeve elitare të Superiores. Kampionati është shumë i fortë, ekipet i karakterizon një luftë e fortë sportive, jo vetëm ata që luftojnë për trofe, por edhe ata që mendojnë qëndrimin në Superiore. Ndaj duhet të bëjmë më të mirën në vazhdimësi, duke nisur nga ndeshja me Laçin", përfundoi Mutumane. Tomor Shehu