Zyrtarizohet divorci, bashkia zero lek Elbasanit
Verdheblutë mes dilemave, pasi pronarët e rinj s’po veprojnë
Dje, në mbledhjen e Këshillit Bashkiak të qytetit të Elbasanit, është bërë miratimi i buxhetit për vitin 2017. Në mënyrë unanime, këshilltarët, si të djathtë edhe të majtë, kanë qenë pro buxhetit të Bashkisë, edhe pse për klubin e futbollit nuk ishte parashikuar asnjë qindarkë. "Panorama Sport" ka siguruar një kopje të buxhetit të 2017-ës, ku në total sportit në këtë qytet i janë akorduar vetëm 42 milionë lekë të vjetër, pjesa më e madhe e të cilit shkon për pagesat e punonjësve. Për futbollin janë parashikuar 0 lek, kjo për faktin se Bashkia e Elbasanit i ka shitur aksionet te kompania angleze "Level Up Sa". Në një situatë të tillë, tanimë edhe zyrtarisht, klubi i futbollit nuk ka më asnjë lidhje me institucionin vendor dhe për Elbasanin po bëhet gati të nisë një epokë e re edhe në menaxhim, pasi do të jetë tërësisht në pronësi të huaj.
Problemi - Nëse në praktikë gjithçka duket në rregull, sepse Bashkia i ka shitur aksionet e saj, problemi qëndron se juridikisht pronarët e rinj nuk kanë marrë në dorë situatën dhe nuk mund të bëjnë investime në klub. Përpos marrëveshjes së mbyllur për blerjen në masën 100% të aksioneve të klubit të futbollit dhe duket sikur nuk ka asnjë shans që kjo marrëveshje të dështojë, procedurat për kalimin e aksioneve te kjo kompani janë kthyer në një odise më vete. Pra, duke qenë se në buxhet Bashkia e Elbasanit nuk ka parashikuar asnjë qindarkë për futbollin, edhe pagat e futbollistëve dhe gjithë shpenzimeve të tjera që kërkon një klub futbolli, do t'u takojnë pronarëve të rinj. Mirëpo, në një kohë kur kjo kompani nuk ka mbyllur ende procedurat për marrjen në dorëzim zyrtarisht të klubit, nuk kuptohet sesi do të derdhë detyrimet që i takojnë për mbajtjen e klubit, duke nisur që me pagat që u detyrohen futbollistëve. Deri më tani, gjatë kësaj periudhe kanë qenë sërish pronarët e rinj që i janë përgjigjur deridiku nevojave të klubit, sidomos për sa i përket pagesës së disa rrogave që kanë marrë lojtarët e ekipit. Megjithatë, fakti që Bashkia e Elbasanit nuk hedh më para për futbollin, nënkupton edhe sigurinë që ka për sa i përket shitjes së aksioneve, ndaj kjo gjë mund të shërbejë edhe si një qetësim për ata që janë skeptikë rreth ardhjes së anglezëve.