Parku Olimpik, sportistët me luksin e saunave
Doçi: Mënyra e menaxhimit përcaktohet një fazë më vonë
Një nga projektet madhore të shumësportëshit "Tirana Olimpik Park" është drejt përfundimit. Zyrtarisht afati dyvjeçar përfundon në qershor të këtij viti, por gjithçka mund të jetë gati në muajin prill. Lajmin e konfirmon për "Panorama Sport" një nga iniciatorët e këtij projekti, drejtori i Agjencisë së Shërbimit të Sportit, Bledar Doçi. "Punët e mëdha janë kryer, kanë mbetur vetëm kurimet e brendshme të vogla. Pra, në fazën 90 për qind është e përfunduar, por janë edhe procedurat që duan kohën e vet, momenti i dorëzimit të objektit. Të paktën shpresoj të jetë gati për 'play off'-in në basketboll dhe volejboll. Sa i përket pallatit të sportit, që në fillim është konceptuar qendër stërvitore për ekipet kombëtare në shërbim të sportit elitar. Në kushtet që ka një kapacitet 1300 vendesh është shumë e përshtatshme edhe për aktivitete, jo vetëm për stërvitje të ekipeve kombëtare. Jo vetëm lojëra me dorë, por edhe hendbolli apo futsalla. Në infrastrukturë janë të përfshirë ambiente për mediat, 28 tualete, mes tyre edhe për persona me aftësi të kufizuara. Ka dalje emergjente, sistemi i kundërzjarrit, parametrat e kërkuara për të bërë një objekt cilësor. Hyrja e sportistëve është më vete, nga pjesa e pasme e sallës që të mos ketë përballje me tifozët. Këta të fundit hyjnë nën ' checkimin' e biletave. Sportistët hyjnë direkt në dhomat e zhveshjeve dhe, më pas, dalin në fushë. Për dijeni ka dy dhoma zhveshjeje, por edhe ambiente të tjera që do përshtaten për këtë funksion. Gjithçka do të varet nga grafiku i ndeshjeve", zbulon titullari i AGJ-së. Dy dhomat e zhveshjeve do të kenë një sipërfaqe 100 metra katrorë; dhomat e zhveshjeve për arbitra 20 metra katrorë; tualeti total 100 m katrorë. Një dhomë me sipërfaqe 21 metra katrorë do të jetë për median, kurse sipërfaqja e parketit është me përmasat 42 m x24 m.
Godina 2 - Veç sallës së lojërave është parashikuar edhe godina hyrëse për federatat e shumësportëshit sipas hierarkisë elitare. "Prioritet do të jenë 15 federatat olimpike, pastaj edhe federatat e tjera do të kenë hapësirë, mes tyre të përbashkëta. Në këtë godinë do të akomodohet edhe Agjencia e Shërbimit të Sportit me gjithë sektorët e vetë, gjithashtu edhe Komiteti Olimpik. Këto ambiente zënë dy katet e sipërme. Gjithashtu është akomoduar sektori i Mjekësisë Sportive dhe zyra e Kontrollit Antidoping dhe dy ambientet e tualeteve meshkuj, femra. Më poshtë janë dy palestrat, një për peshëngritjen dhe një për mundjen për ekipet kombëtare. Palestra e mundjes do të vlejë edhe te sportet e tjera individuale. Te dy këto salla janë dhoma e trajnerit, dhomat e zhveshjeve për sportistët dhe sauna nga të dyja krahët (meshkuj dhe femra). Gjithashtu do të jetë në shërbim edhe ashensori për zhvendosjen e pajisjeve të shtangës". Doçi nuk e përjashtoi mundësinë që këto ambiente të shfrytëzohen nga klubet kryeqytetase të detyruara për të bërë edhe një pagesë. Në fund të deklaratës, Doçi sqaroi se menaxhimi i këtij investimi do të diskutohet në një fazë të mëvonshme.