Zyrtari i FIBA-s: Shqipëria shpëton nga gjobat
"Nuk ka mundësi që të organizoni turne në këtë impiant"
Shqipëria ka marrë "bekimin" e parë nga ndërkombëtarët për Parkun Olimpik. Një nga këshilltarët kryesor të presidentit të Federatës Botërore të Basketbollit (FIBA), Lubomir Kotleba, ka bërë dje një inspektim të punimeve të Parkut Olimpik në shoqërinë e sekretarit të përgjithshëm të Federatës Shqiptare të Basketbollit, Korab Llazani, dhe drejtorit të Agjencisë së Shërbimit të Sporteve, Bledar Doçi. Në përfundim të vëzhgimit të këtyre ambienteve, zyrtari i FIBA-s dha lajmin pozitiv që Shqipëria mund të zhvillojë ndeshje ndërkombëtare në këtë impiant pa u shoqëruar më me gjoba për mosplotësim standardesh. "Kur e pashë nga jashtë mbeta i habitur sepse ishte diçka shumë e bukur. Më pas, në brendësi, ka një sërë mangësirash dhe kjo është një surprizë jo e mirë. Megjithatë, sa u përket gjobave, dua të theksoj se FIBA nuk vendos gjoba, ajo është një organizatë fleksibël. Sigurisht që përdorimi i impianteve do të jetë i kufizuar. Por, gjithsesi, ju vazhdoni të luani ndeshje me skuadrën kombëtare dhe do të vazhdoni ta bëni një gjë të tillë", u shpreh Lubomir Kotleba, vëzhgues i FIBA-s. Përtej ambicieve të Federatës Shqiptare për të qenë edhe organizatore në të ardhmen e turneve ndërkombëtare, sikur edhe të moshave, zyrtari i FIBA-s e ka rrëzuar një opsion të tillë. "Për sa i përket organizimit të aktiviteteve ndërkombëtare, po e përsëris se për Shqipërinë do të jetë e vështirë që të presë ndonjë eveniment të rëndësishëm",
u shpreh Kotleba. Kombëtarja shqiptare në basketboll për meshkuj i rikthehet në muajin gusht arenës ndërkombëtare me paraeliminatoret e Kupës së Botës 2019. Djemtë e drejtuar nga trajneri Antonis Konstantinides janë shortuar në grupin B europian së bashku me Austrinë dhe Holandën.