Falet Bonuçi, titullar me Empolin
29-vjeçari nuk festoi te goli i parë, por dalin videot ku gëzoi si ultras tek i dyti
Leonardo Bonuçi pa goi për të gjithë skuadrën, në emër të të gjithë "rebelëve" të tjerë që këtë sezon gjetën guximin dhe nuk ngurruan që të protestojnë hapur ndaj trajnerit Masimiliano Alegri, duke nisur nga Manxukiçi, Higuaini, Khedira, Lihshtajneri dhe Dibala. Gjithsesi, kjo çështje do të mbyllet me kaq, sepse i gjithë grupi e ka marrë shumë të qartë mesazhin, prandaj skena të tilla vështirë se do të përsëriten dhe do të shihen më, duke parë se në anën e trajnerit qëndroi edhe kryesia e klubit. Dhe, siç tha "Konti Maks", çështja është e mbyllur pas pezullimit të liderit të mbrojtjes bardhezi në "Do Dragao", sepse Leonardo Bonuçi do të rikthehet menjëherë në grup dhe do të jetë në fushë nga minuta e parë, në kampionat, kundër Empolit. Nuk ka dyshime se 29-vjeçari është një nga kolonat kryesore të formacionit bardhezi, një atlet dhe një profesionist i vërtet, por edhe një qenie njerëzore si të gjithë, të cilit mund t'i fluturojë nervozizmi dhe të gabojë. Alegri e ka falur lojtarin, sepse vetë futbollisti ka kërkuar falje përpara të gjithë skuadrës, pas fitores me Porton, një veprim ky që është pritur me një duartrokitje, me festë dhe me një përqafim mes dy "sherrxhinjve". Ky sukses në Europë ka risjellë paqen dhe harmoninë në grup, sepse si gjithmonë, pas stuhisë shkëlqen dielli...
Leo festoi... - Në një filmim të parë, pamjet e një Bonuçi të mërzitur në maksimum në tribunë e treguan, teksa ai nuk e ndjeu të festojë në rastin e golit të parë të Juventusit, të shënuar nga Pjaca, madje duke refuzuar edhe përqafimin e zëvendëspresidentit Pavel Nedved. Kjo ngriti pluhurin se tashmë mes lojtarit dhe bardhezinjve ishte krisur gjithçka, por kaluan vetëm 141 sekonda dhe goli i dytë i Daniel Alveshit dërgoi Leonardon që të shpërthejë njësoj si një ultras, duke e ndarë gëzimin e tij edhe me drejtuesit e tjerë që ishin në tribunën e impiantit portugez, festim që ka ngrohur atmosferën dhe ka qetësuar edhe tifozët, pas atyre lajmeve se ndoshta numri 19 bardhezi po meditonte realisht edhe largimin nga "Zonja e Vjetër", në fund të këtij sezoni.