Mercedes “heq vellon” e W08-ës
Gjermanët humbasin traditën, njëvendëshja e re ndryshon formën e "peshkaqenit"
Mercedes "hoqi vellon" ditën e djeshme, teksa zbriti në pistën e Silverstonit për të prezantuar makinën e re W08, që do të përdoret në Botërorin e ri të Formula 1. Makinat e Formula 1 të këtij viti do të jenë ndryshe nga ato të vitit 2016, për shkak të ndryshimeve në rregullore. Gomat do të jenë më të gjera, gjë që do të rrisë shpejtësinë në marrjen e kthesave. Ashtu siç ka ndodhur në vitet e fundit, edhe për këtë sezon, Mercedesi do të jetë skuadra për t'u mundur në Formula 1 dhe Luis Hamilton është kandidati kryesor për të fituar titullin botëror për pilotë. Këtë vit, shoku i tij i skuadrës do të jetë finlandezi Valteri Botas, i cili zëvendësoi Niko Rosberg, me gjermanin që u tërhoq, pasi u shpall kampion bote në vitin 2016.
Risitë - Ajo që ka spikatur dje te modeli ri i Mercedesit është bishti i makinës, që është më i vogël se ai i sezonit të fundit, ndërsa pjesa e përparme e autoveturës është më e gjatë, që t'i mundësojë një ngarkesë më të madhe aerodinamike përdorimit të gomave "Pireli". Disa nga karakteristikat e tjera që ka spikatur është "hunda" e makinës, e cila sivjet është më e gjatë. Njëvendëshja, që ruan hegjemoninë prej disa vitesh në Botërorin e Formula 1, ka humbur traditën që e ka shoqëruar prej vitesh, pasi vitin e ardhshëm nuk do të ketë më imazhin e "peshkaqenit" që e ka dalluar, teksa edhe motori nga pas duket më i gjatë nëse e krahasojmë me veturën që dominoi kampionatin vitin e fundit.
Toto Uolf - Pas prezantimit të makinës, përgjegjësi i Mercedesit i analizoi me këto fjalë ndryshimet që i janë bërë njëvendëshes: "Kur kemi ndryshime të rregullores, - ka shpjeguar Uolf, - je i detyruar që të ndryshosh edhe projektet. Sot (dje) kemi zbritur në pistë për të testuar makinën, teksa i kemi kaluar me sukses provat në pistë. Jemi shumë të lumtur dhe krenarë për punën që kemi bërë deri më tani në ndërtimin e makinës së re", tha fillimisht përgjegjësi i Mercedesit. Më tej, ai u shpreh:
"Stafi ynë teknik është më i miri dhe kjo është arsyeja pse kemi një pritshmëri të madhe për këtë makinë. Jam i bindur që Mercedes i ka të gjitha letrat në rregull për t'u konfirmuar kampione. Hamilton dhe Botas janë shumë të lumtur për makinën e re".