"Pero di të vjedhë hapësirën, por ja si mund të markohet..."

Agim Canaj e njeh mjaft mirë kroatin Pejiç, pasi me të ka punuar te Dinamo, por edhe te Kukësi. Ish-trajneri i këtyre të fundit tregon disa nga cilësitë e veteranit kroat, por edhe sekretet se si mbrojtësit mund ta bllokojnë. I pyetur nga "Panorama Sport", Canaj thotë se regjimi që ndjek i ka shtuar jetëgjatësinë në sport.

"Pejiç është një lojtar që e njeh mjaft mirë hapësirën pas mbrojtësve dhe kjo është pika e tij më e fortë. Ai është shumë efektiv edhe për faktin se mbrojtjet shqiptare luajnë jashtëzakonisht shumë të hapura. Pejiç e shfrytëzon mirë edhe mungesën e koordinacionit të mbrojtjeve, ndërsa problemi i tij më i madh është marrëdhënia që ka me topin. Ai ka staturë shumë të lartë dhe kjo i krijon mangësi. Është i zgjuar për të kuptuar vertikalizimin e kundërshtarëve dhe i qetë përpara portës kundërshtare. Është përshtatur shumë mirë në kampionatin shqiptar dhe ka një dekadë në Shqipëri. Eksperienca e ndihmon shumë. Pejiç mund të luajë në të gjitha modulet dhe nuk varet nga skemat, sepse ai i ka shënuar të gjithë golat duke u marrë hapësirat mbrojtësve. Ka një shpejtësi të admirueshme dhe kjo e bën atë të jetë shumë efikas në fazën sulmuese. Një element tjetër që e ndihmon shumë është fiziku i tij, sepse e mbron mjaft mirë topin dhe kombinon me mesfushorët që i vijnë nga pas. Në këtë mënyrë ai fiton hapësirën. Pejiç punon mjaft mirë në lojën e ajrit dhe nuk rri kurrë i palëvizshëm. Ai mundohet të vjedhë gjithmonë kohën e mbrojtësve. Nuk rri kurrë në qendër të mbrojtjes, por lëviz sa majtas dhe djathtas duke u munduar të krijojë hapësira për veten, por edhe për të tjerët. Mirëpo Pejiç sigurisht që mund të bllokohet dhe kjo arrihet duke e lënë të marrë topin dhe më pas duke ia bllokuar hapësirën, sepse nuk driblon dot në zona të ngushta.

Pejiç është më i avantazhuar nga sulmuesit e tjerë, sepse e njeh më mirë kampionatin dhe skuadrën, por mbi të gjitha edhe ambientin. Ndonjëherë sulmuesit nuk funksionojnë nëse skuadra që kanë nga pas nuk lëviz aq sa duhet. Pejiç është një lojtar profesionist dhe stërvitet në mënyrë ekselente. Kroatët janë lojtarët më të përkushtuar dhe më profesionistë që kanë ardhur në Shqipëri. Ai nuk bën kurrë polemika, dëgjon shumë dhe zbaton detyrat. Regjimi i tij është për t'u admiruar dhe kjo gjë sjell edhe jetëgjatësinë e tij në sport", tha Canaj.