Apolonia i falet Goros, Kinostudio “shkërmo!” Juban Danjën

Pas humbjes në finalen e Kupës së Shqipërisë ndaj Vllaznisë, Apolonia rikthehet te fitorja dhe mban ritmin e kampioneve. Fieraket mposhtën minimalisht Teutën në shifrat 0-1. Loja ishte e fortë dhe me mundësi nga të dyja ekipet. Përpjekjet e fierakeve për të shënuar konkretizohen në minutën e 38-të kur Goro shënon golin e avantazhit. Pavarësisht përpjekjeve respektive për shënim, asgjë nuk ndryshon deri në fund. Skënderbeu ka arritur një fitore me shumë vlera në transfertën kryeqytetase kundër Dajtit falë dopietës së Joana Niçkut. Ka qenë një lojë e baraspeshuar nga të dyja skuadrat, ku vlen të përmendet mesfushorja Esma Hysaj. Ndonëse e dëmtuar në kokë dhe e fashuar, zgjodhi të luajë deri në minutën e fundit. Nga skuadra korçare bëri diferencë sulmuesja Joana Niçku duke realizuar nga një gol në secilën pjesë loje. Në ndeshjen e luajtur në Shkodër, Juban Danja ka humbur 1-8 ndaj Kinostudios. Vajzat mike kanë dominuar krejt takimin. Kjo përballje është luajtur në një terren të vështirë për shkak të reshjeve të shiut që kanë rënë në qytetin e Shkodrës. Në pjesën e parë, Kinostudio ka realizuar 4 gola, ndërsa 4 të tjerë në të dytën. Paula Jaku ka shënuar golin e nderit në fillim të pjesës së dytë, ndërsa për Kinostudion Estele shënoi 3 gola, Lupo 2 gola dhe nga një gol Myrtollari, Bajrakurtaj dhe Lamo. Ndërkohë, ndeshja tjetër mes The Door dhe TiranaAS e planifikuar për t'u luajtur në Shkodër nuk është zhvilluar. Shkak është bërë terreni i papërshtatshëm.

R.Gjini/A.Dushku/S.Nikshiqi