Mundja bën bilancin vjetor, shpall edhe objektivat
Federata Shqiptare e Mundjes ka zhvilluar dje analizën vjetore. Sipas rendit të ditës fillimisht u bë një panoramë e përgjithshme e aktiviteteve vjetore të FSHM-së për vitin 2016 dhe pasqyrimi i shpenzimeve financiare. Më pas u vijua me miratimin e projekt-kalendarit të aktiviteteve për 2017-ën; veprimtarive financiare; u përcaktuan objektivat për ecurinë dhe problematika të tjera lidhur me FSHM-në si dhe plotësimi me bazë materiale për zhvillimin normal të aktiviteteve. Gjithashtu, në fokusin e federatës për këtë vit do të jenë trajtimet për sportistët. Sipas sekretarit të përgjithshëm Ndriçim Spahiu, 2016-ta për FSHM-në ka qenë e suksesshme dhe objektivat u realizuan plotësisht në bazë të buxhetit vjetor. Gjatë këtij viti janë zhvilluar 18 aktivitete, 7 kombëtare, 3 rajonale dhe 8 ndërkombëtare. "Qëllimi i federatës mbetet përpjekja për të siguruar të ardhmen e mundjes shqiptare duke arritur performanca të klasit botëror. Gjithashtu në objektivat e saj është rritja e pjesëmarrjes, e të ardhurave dhe shikueshmëri publike si dhe zhvillimi i infrastrukturës. Paralelisht FSHM-ja ka marrëdhënie të shkëlqyera me Federatën Botërore, e cila më 9 shkurt të 2016-ës dhuroi një tapet me përmasa olimpike me objektiv rritjen e infrastrukturës dhe cilësisë sportive. Ky tapet do të vendoset në palestrën e re të Parkut Olimpik", deklaroi sekretari Spahiu. Të pranishëm në asamble ishin: presidenti i FSHM-së, Martin Biba, anëtarë të komitetit drejtues dhe anëtarë të FSHM-së, përfaqësues nga klubet përkatëse si trajnerë, gjyqtarë dhe sportistë elitarë.