Plan madhor, kinezët duan Konten tek Interi

Stefano Pioli humb "pikë", kinezët duan një trajner me profil të lartë

Disfata që pësoi Interi përballë Romës do të mbahet mend gjatë prej Stefano Piolit, i cili mund të ketë hedhur tutje një pjesë të mirë të shanseve që kishte për të rinovuar kontratën me milanezët. Trajneri ka respektin e "Mr.Suning", por nuk ka fituar besimin e bosit kinez. Ky i fundit nuk pret dhe do që në krye të Interit të emërohet një emër i madh. Sipas "Repubblica"-s, një kandidaturë e fortë për të marrë rolin e Piolit do të ishte pikërisht Antonio Konte.

Pakënaqësitë - Sipas të përditshmes në fjalë, trajneri italian mund të mos qëndrojë gjatë në Londër. Konte ka një "llogari" të hapur me drejtuesit e Çelsit. Këta të fundit pranuan që Konte të ndiqej në "Stamford Bridge" vetëm prej tre nga gjashtë bashkëpunëtorët e tij të ngushtë. Ky vendim i klubit, i bashkuar me shqetësimet për investimet në të ardhmen, mund të shtyjnë leçezin që të largohet vetëm një vit pas transferimit në Londër. Mes të tjerash, Konte nuk ndihet i sigurt në Angli, pasi e ka të qartë se në vështirësinë e parë klubi do ta braktiste në fatin e vet (siç bëri me Ranierin dhe Ançelotin).

Gati për gjithçka - "Repubblica" i dha jetë një skenari "të frikshëm". Në shkrim thuhej se për Zhang Jindong paratë nuk janë problem dhe si rrjedhojë edhe klauzola, e cila mban Konten deri në 2019- ën në

"Stamford Bridge", nuk do të jetë një pengesë. Numri një i Interit ka treguar se është gati të paguajë shifrën (rreth 30 mln euro). Kjo do të ishte një "kundërpërgjigje" e fortë për Juventusin. Torinezët thuhet se prej kohësh kanë nisur të bisedojnë me Simeonen...