Sot derbi i vogël, kapitenët premtojnë spektakël dhe gola
Partizani B dhe Tirana B luajnë sfidën e radhës në Pezë
Pas derbit të madh të kryeqytetit ndërmjet Partizanit dhe Tiranës, një tjetër "derbi" do të luhet sot. Bëhet fjalë për përballjen e ekipeve B që militojnë në Kategorinë e Dytë. Ndeshja do të luhet sot, në orën 14: 00, në Pezë. Ndryshe nga derbet e skuadrave të para që prodhojnë shumë zhurmë, përplasje, gjakosje dhe tension, ndeshjet e ekipeve B janë paqësore. Të tilla kanë qenë gjatë të gjithë këtyre viteve që skuadrat luajnë me njëra- tjetrën. Madje, në sfidën e fazës së parë ku skuadrat barazuan 1- 1 në "Skënder Halili", tifozët qëndruan së bashku dhe nuk ishte e nevojshme për kordonë policie. Partizani duket më i plotësuar nga ndeshja e mëparshme me rikthimin e Alken Agalliut, Mario Lilës dhe Viktor Memës, të cilët janë një garanci për repartin mbrojtës. Ndërkohë që në ekipin kryeqytetas duket më në formë sulmuesi Keqa, i cili arriti të shënonte gol në fazën e parë ekipit të Partizanit. Kapitenët
Kështu, kapiteni i Partizanit B, portierin Xhuljo Hoxha, shprehet: "Është një ndeshje derbi dhe, si e tillë, të krijon mjaft emocione, sidomos kur përballemi në pozicione të barabarta. Ne si skuadër jemi më lart për sa i përket cilësisë së futbollistëve dhe lojërave gjatë ndeshjeve. Kemi një qarkullim të mirë topi, si dhe krijojmë aksione sulmuese të rrezikshme. Duke u nisur nga këto avantazhe, mendoj se derbin do ta fitojmë ne dhe shkëputemi nga Tirana". Ndërkohë, për kapitenin bardheblu, Rei Qilimi, sfida përfundon me triumfin e Tiranës. "Është një ndeshje derbi që ka emocionet e veta, por jo në përmasat e sfidës së ekipeve të para. Gjithsesi, parashikoj një ndeshje të bukur, e cila do të dhurojë spektakël dhe skuadra jonë do të dalë fituese. Ne, edhe pse nuk kemi synime për t'u ngjitur, qëllimi ynë është të renditemi sipër Partizanit". Abdulla Dushku