Dinamo shtang Tomorin në fund
Beratasit nuk ruajnë dot avantazhin, mbeten në garë për 5-shen e parë në grup
Tomori gabon ndaj Dinamos, ku në sta diumin e Kuçovës "Bashkim Sulejmani" nuk arrin më shumë se barazimi. Beratasit ishin shumë pranë fitores përballë Dinamos që kishte tri mungesa në mbrojtje, por u ndëshkuan në fund. Pikërisht në minutën e 85-të, dinamovitët kanë befasuar me anë të 18-vjeçarit Sallaku, i cili, i futur në pjesën e dytë, rezultoi një zëvendësim efikas për teknikun Allmuça. Tomori mbetet në vendin e 4-t dhe do t'i duhet që në ndeshjen e fundit të fazës së dytë në Elbasan të kërkojë rezultat pozitiv dhe të shpresojë që të ndalen edhe rivalët për të siguruar 5-shen e parë për fazën e tretë. Nga ana tjetër, Dinamo është zyrtarisht në luftë për mbijetesë pasi në fazën e tretë do të bëjë pjesë në 5-shen e dytë.
Ndeshja
Rreziku i parë vjen në minutën e katërt ku pas kombinimit Agastra-Mirani largon topin në vështirë mbrojtësi Peqini. Pas tre minutave rrezikojnë përsëri vendësit me
anë të Kirit, por topi përfundon jashtë. Epërsia e beratasve është konstante, ku në ndihmë të sulmit është edhe mbrojtësi shtatlartë Bitri. Ndërsa dinamovitët luajnë më të kujdesshëm në mbrojtje, ku mundohen të godasin me anë të kundërsulmit. Pas
shumë përpjekjesh, vjen goli për beratasit. Mirani shpërthen bukur dhe frenohet në mënyrë të parregullt nga Peqini që shkakton penallti. Nga pika e bardhë godet Çaço që shënon. Pjesa e dytë është më e bukur, ku dinamovitët nuk pajtohen me humbjen.
Gjithsesi, fillimi do të jetë për vendësit, të cilët rrezikojnë me kokë me anë të Pajës. Ndërkohë, tekniku mik Allmuça kryen të tre zëvendësimet. Është pikërisht Sallaku, i cili, pas harkimit të Muratajt nga krahu i majtë, shënon me të majtën me një gjuajtje fluturimthi
brenda zonës. Befasohen vendësit, të cilët në minutën e 93-të janë shumë pranë golit të fitores, por gjuajtjen e Bitrit me kokë e ndal portieri mik në vijën fatale. Një barazim që duket se la të pakënaqur të dy ekipet, sidomos skuadrën beratase.