117-vjetori i Bajernit, Nojer premtim special
"Shalke është mobilizuar, do të mjaftohesha me kualifikimin"
Bajerni i Mynihut ka festuar ditën e hënë 117-vjetorin e themelimit të klubit. Klubi, i krijuar nga 11 emra të shquar me presidentin e parë Franc Xhon, u shndërrua në ekipin më të titulluar dhe më të pasur në Gjermani. Klubi, me selinë e tij të parë në kafe "Gizela", sot numëron mbi 280 mijë anëtarë duke qenë kështu edhe klubi më i madh në botë. Bajerni mbështetet nga më shumë se 4200 fanklabe në të gjithë botën. Një ndër to është edhe në Shqipëri. Në këto 117 vite, rekordmenët kanë fituar 26 tituj, 18 Kupa të Gjermanisë, 5 Champions, 2 botërore klubesh dhe shumë tituj të tjerë. Në këtë ditë të shënuar, drejtori ekzekutiv, Rumenige, ka çelur dhe inauguruar televizionin zyrtar "Fc Bayern Tv" ku do të jenë ekspertë dy ish-bavarezë, Andreas Otl dhe Klaus Augentaler. Për këtë ditë të shënuar dhe çerekfinalen ndaj Shalkes ditën e mërkurë ka folur portieri Manuel Nojer.
Nojer kërcënon ish-skuadrën
Për portierin e Bajernit do të jetë një ndeshje mjaft interesante, pasi do të përballet me ishskuadrën. "Nuk ka kaluar shumë kohë nga ndeshja e fundit
ndaj Shalkes. Blutë e kanë marrë veten dhe në një finale gjithçka është e mundur. Herën e fundit mbetëm shumë të zhgënjyer, pasi nuk e fituam dot duelin e parë në shtëpi për vitin 2017. Në kupë të gjithë e dimë që gabimet nuk tolerohen. Është shumë pozitive që kemi
treguar moral të lartë në dy sfidat e fundit. Nëse Arsenalit i shënuam 5 dhe Hamburgut 8 gola, kundër Shalkes mjaftohem me fitore minimale pa pësuar", nënvizoi Nojer duke e mbyllur me 117-vjetorin,- "Dhurata për këtë jubile është kualifikimi në gjysmëfinale".