Basketbolli shqiptar feston sot 70-vjetorin
Mbrëmje Gala, prezentë autoritetet më të larta në vend
Dita e sotme do të jetë festë për basketbollin shqiptar. 70 vjet "jetë", histori suksesi, arritjesh dhe krenarie për Federatën Shqiptare të Basketbollit. Basketbolli me emra, ndër më të mëdhenjtë në sportin shqiptar, do të festojë sot 70-vjetorin që kur Shqipëria është bërë anëtare e FIBA-s dhe zyrtarisht është data e krijimit të FSHB-së e ndërkombëtarizuar si vendi i 49-të e organizmit më të lartë të Botërorit të "koshit". Sekretari i përgjithshëm i Federatës, Korab Llazani, tha për gazetën "Panorama Sport" se dita e sotme do të rezervojë takime intensive me krerët më të lartë të shtetit në vend, teksa me rëndësi do të jetë edhe vizita e presidentit të FIBA Europe, Turgai Demirel, një mik i hershëm i shqiptarëve. "Federata Shqiptare e Basketbollit nën patronazhin e presidentit Avni Ponari do të organizojë sot (nesër) në Pallatin e Brigadave një ceremoni Gala me praninë e të gjithë strukturave më të larta të shtetit, presidentin e Republikës, Bujar Nishani, kryeministrin Edi Rama dhe shumë personalitete të tjera. Gjithashtu në këtë ditë speciale për basketbollin ka konfirmuar pjesëmarrjen edhe presidenti i FIBA EUROPE, Turgai Demirel, dhe presidenti i Ligës Ballkanike", tha sekretari Llazani për gazetën. Përpos përshëndetjeve të rastit, mbrëmja e sotme do të rezervojë edhe vlerësime mirënjohje nga ana e kreut të shtetit për shumë prej figurave të nderuara të basketbollit për kontributin e dhënë ndër vite. Gjithashtu në axhendën e sotme janë parashikuar një sërë takimesh dhe aktivitete kombëtare. HISTORIKU - Deri nga fundi i vitit 1945, në Shqipëri nuk kishte struktura apo persona të ngarkuar për t'u marrë drejtpërdrejt me problemet e basketbollit. Kjo gjë u bë e mundur vetëm kur u krijua Federata Sportive Shqiptare në shtator të vitit 1945, kur pranë saj u krijuan Komisione Teknike, që merreshin me hartimin e kalendarit sportiv dhe organizimin e veprimtarive kombëtare. Ato ishin të organizuara në tri seksione. Njëri prej tyre ishte edhe ai i Lojërave Sportive, në të cilin bënte pjesë edhe inspektori i sporteve me dorë, që mbulonte, veç të tjerash, edhe basketbollin. Me këtë organizim të punës u bë e mundur që të kishte një strukturë dhe një person të ngarkuar drejtpërdrejt me problemet e basketbollit. Në këtë mënyrë u plotësuan kushtet për krijimin në vitin 1946 të Federatës Shqiptare të Basketbollit (FSHB). Kështu vendi ynë kishte një institucion të specializuar që ndiqte dhe drejtonte zhvillimin e basketbollit shqiptar brenda vendit, por edhe përfaqësonte formalisht vendin tonë në marrëdhënie me jashtë për basketbollin, por lidhjet me jashtë mbaheshin ende nëpërmjet Federatës së Sporteve Shqiptare, e cila mbante lidhjet me federatat ndërkombëtare.