Skënderbeu, gati lista e spastrimeve
Pritet që të largohen disa nga “yjet” e skuadrës, ja emrat e parë të merkatos së verës
Humbja e titullit ka bërë që klubi i Skënderbeut të bjerë në qetësi. Natyrisht që zhgënjimi ka qenë i madh, kjo edhe për faktin se korçarët luftuan deri në fund për titullin, por, gjithsesi, situata në klub duket e qetë. Bardhekuqtë kanë edhe një ndeshje formale kundër Partizanit në fundjavë, më pas e gjithë vëmendja do të spostohet në finalen e Kupës së Shqipërisë kundër Tiranës, që do të luhet më 31 maj në "Elbasan Arena". Fitimi i atij trofeu do të ishte një ngushëllim për ekipin e Ilir Dajës, që do bënte të harrohej dhimbja e madhe që solli humbja e titullit. Përveç zhgënjimit nga faktorë të jashtëm në humbjen e kampionatit, te Skënderbeu tashmë po ndihen edhe disa zëra bezdisës, që lidhen me një rrëzim të mundshëm në Kategorinë e Parë. Fjalë të ndryshme po qarkullojnë kohët e fundit në opinionin sportiv se UEFA, në bashkëpunim me Komisionin e Etikës në FSHF, ka përgatitur një surprizë të pakëndshme për korçarët në fund të sezonit, duke i zbritur këta të fundit një kategori më poshtë. Këto fjalë kanë mbërritur në ambientet e klubit të Skënderbeut, por ato nuk i shqetësojnë aspak drejtuesit korçarë. Drejtuesit i injorojnë këto zëra, pasi janë duke menduar që tani për paraqitjen në Kupat e Europës, si dhe për sezonin e ri, kur synohet
përforcimi i ekipit me elementë cilësorë. MERKATOJA E KORÇARËVE
Hapja e merkatos së verës pritet të sjellë ndryshime të mëdha te Skënderbeu. Ajo që duket e pashmangshme është largimi i yllit të skuadrës, Liridon Latifit. Mesfushori ka bërë
gati valixhen dhe po pret zyrtarizimin te një klub i njohur europian. Gent është alternativa kryesore për kosovarin, i cili pritet të thyejë një rekord sa i përket shumës që do përfitojë klubi me shitjen e tij. Gjithashtu, edhe Lacio në Serinë A mbetet një alternativë serioze për
Latifin. Ndërkohë, përveç Latifit, te Skënderbeu mund të kemi edhe largime të tjera të rëndësishme. "Panorama Sport" mëson se Hamdi Salihi, Nuredin Orelesi, Xhejms Adeniji, apo edhe ndonjë lojtar tjetër i rëndësishëm mund të largohet skuadra në merkaton e verës.