Zbardhet axhenda e festës, Kukësi fton edhe rivalët
Koncert dhe mijëra të ftuar, ja masat e klubit verilindor
Kukësi arriti të fitojë kampionatin, por ajo festë e përligjur ditën e diel, më datë 20 maj, në "Zeqir $meri" nuk do të jetë asgjë para festës gjigante që e pret qytetin e Kukësit, ambientin sportiv shqiptar, ekipin e Kukësit, që pikërisht do të organizohet ditën e diel, plot një javë mbrapa nisjes së festimeve, për titullin. Gazeta "Panorama Sport" zbulon ekskluzivisht gjithë skenarin e festës madhështore që klubi i Kukësit do të zhvillojë në qytetin verilindor në të cilin do të çojë trofeun.
AXHENDA
Kukësi luan ditën e shtunë ndaj Luftëtarit në Gjirokastër, ndeshje të cilën, edhe pse nuk ka stimuj apo objektiva, verilindorët e kanë marrë seriozisht dhe pritet të mos tolerojnë, nënvlerësojnë apo mos të ingranohen sa duhet, kjo thjesht për faktin se presidenti Gjici, por dhe trajneri Gjoka dëshirojnë që Kukësi ta mbyllë sezonin pa humbje, me qëllim që verilindorët të arrijnë një rekord të ri në Superiore. Objektivi i dytë është që Pero Pejiç të arrijë të shënojë dhe të rrisë numrin e golave të shënuar. Por, paçka se si do të përfundojë takimi, Kukësi në Gjirokastër do të marrë trofeun zyrtarisht. Mbas ndeshjes do organizohet dhe ceremonia zyrtare nga Federata Shqiptare e Futbollit, ku verilindorëve do iu dorëzohet dhe kupa. Mbas ceremonisë zyrtare në Gjirokastër, ekipi do udhëtojë drejt Tiranës. Lojtarët do shpërndahen nëpër shtëpitë e tyre, do bëhen gati dhe të gjithë ditën e diel pasdite do nisen drejt Kukësit për të marrë pjesë në festën e madhe të titullit. PARAKALIMI I LOJTARËVE ME TROFEUN
Para se të nisë koncerti në orën 20: 00, i gjithë ekipi, futbollistët, stafi, presidenti etj., do të bëjnë një parakalim në gjithë bulevardin e qytetit, ku do të ekspozojnë trofeun dhe do të takojnë njerëzit. Dilema është që me çfarë do të bëhet parakalimi W ! Është menduar që parakalimi të bëhet me autobus të hapur, siç ndodh me të gjitha ekipet kampione në Europë, por akoma në Shqipëri stafi i Kukësit nuk ka arritur të gjejë një autobus të tillë me
qira. Dhe Kombëtarja që ka bërë parakalimin nga Rinasi në Tiranë me një autobus të tillë e ka marrë me qira në Greqi, pasi në Shqipëri nuk ka një të tillë. Stafi i ekipit verilindor po interesohet edhe në vendet fqinje dhe nëse do arrijë ta gjejë, ajo do jetë zgjidhja e parë, në të kundërt do shikohet një alternativë e ngjashme, nëse mund të modifikohet mjet i madh i hapur. Por, një alternativë sa e thjeshtë, aq edhe ekonomike është që ekipi të dalë në këmbë, pasi dhe vitin që shkoi kur parakalimi
u bë me limuzina nuk rezultoi aq praktik dhe i suksesshëm. KONCERTI
Mbas parakalimit prej pak më tepër se një orë, në orën 20: 00 në sheshin e qytetit, në skenën e madhe që do të jetë montuar në të, do të nisë koncerti madhështor, për të cilin klubi i Kukësit ka kontraktuar një kompani që merret me organizime eventesh. Në këtë koncert janë ftuar shumë këngëtarë të shquar, humoristë, aktorë, rapsodë nga Shqipëria dhe nga trevat, pasi çdo gjë që ndodh
do ketë ngjyra tradicionale. Në fillim do prezantohen lojtarët e secilit prej tyre do t'i bëhet një përshkrim i shkurtër, të cilëve do iu ndahen dhe medaljet përkatëse. Në tribunë do të jenë njerëz të rëndësishëm duke filluar që nga presidenti i Federatës Armand Duka, presidenti i klubit Safet Gjici, ish- sportistë të tjerë të famshëm shqiptarë dhe kuksianë, gazetarë nga të gjitha mediat, biznesmenë të ndryshëm etj. Banderola dhe dekori do të jetë jashtëzakonisht i shumtë, bashkë me trofeun do hapen
shampanja dhe fishekzjarrët.
RISIA
Klubi i Kukësit duket se këtë eveniment kërkon ta kthejë në një festë kombëtare në sport, pasi në shesh pritet të jenë 20 mijë njerëz sipas tyre, por më e bukura është se drejtuesit verilindorë do të ftojnë të gjithë presidentët dhe trajnerët e ekipeve të Superiores, diçka e paprecedentë për mirë. Por, nuk dihet nëse homologët e Gjicit, Ardjan Takaj dhe Gaz Demi, do e pranojnë ftesën e verilindorëve duke parë dhe replikat dhe akuzat e muajve të fundit, apo e homologëve të Gjokës, trajnerit Ilir Daja dhe Sulejman Starova. Gjithsesi, pikërisht kjo është arsyeja e ftesave që të ulen gjakrat, çdo gjë të sheshohet dhe të gjithë të kontribuojnë në mënyrë sa më pozitive dhe njerëzore në
futboll. Mbas koncertit që do të zgjasë deri në mesnatë për qytetarët, do të zhvillohet edhe darka zyrtare, në të cilën janë të ftuar shumë personalitete të sportit, politikës, biznesit, medias, ishsportistëve etj. Pritet që kostoja e gjithë evenimentit madhështor të kapë një shifër mjaft të lartë.
MASAT
Ashtu si në ndeshjen ndaj Skënderbeut, drejtuesit e klubit të Kukësit me në krye shefin e klubit Jonuz Hallaçin, i cili është në krye të organizimit të gjithë këtij aktiviteti madhështor, janë në gatishmëri të plotë. Janë bërë të gjitha lajmërimet zyrtare përkatëse, janë lajmëruar për të qenë në gatishmëri policia, ambulancat, spitali, zjarrfikëset, kryqi i kuq, grupet e tifozëve etj., kjo për faktin se çdo gjë duhet të shkojë siç duhet dhe mos të ndodhin incidente.