Bakaj: Ja pse nuk dua të luaj kundër Tiranës
"S’ma bënte zemra, ndeshjen nuk do ta shoh as në televizor"
Elis Bakaj konfirmon largimin nga Vl laznia. Pas lajmit ekskluziv të publikuar dje në "Panorama Sport", ku fantazisti u kishte kërkuar drejtuesve të klubit dhe trajnerit, që të mos luante në ndeshjen ndaj Tiranës, vjen edhe konfirmimi nga vetë lojtari. Në një bisedë për televizionin "Top Channel", Bakaj ka sqaruar vendimin e tij, ndërsa tashmë gjasat janë që të vijoj karrierën jashtë Shqipërisë. Gazeta zbulon se skuadra e tij e re mund të jetë FC Perak në Malajzi.
REAGIMI
"Kam vendosur të mos luaj në ndeshjen kundër Tiranës. Bardheblutë janë skuadra që dua, ndërsa Vllaznia më ka respektuar shumë dhe unë gjithashtu e respektoj shumë. Për të mos u paragjykuar dhe meqë nuk ndihem në 100% të formës për këtë ndeshje, vendosa të jem më i ndershëm dhe të heq dorë nga aktivizimi. Kontrata ime ka përfunduar me Vllazninë dhe i falënderoj drejtuesit për ndihmën që më kanë dhënë këtë periudhë dhe gjithmonë, por tani më duhet të iki. Mendoj që sido që të luaja në këtë ndeshje, do të paragjykohesha nga njëra palë apo tjetra. E di që jam profesionist dhe nëse ky takim do të ishte finale Kupe apo kampionati, do jepja maksimumin për Vllazninë, por meqë është për të rënë nga Superiorja dhe unë i dua shumë të dyja skuadrat, nuk më bën zemra të luaj", - ka thënë Elis Bakaj. Në fund fantazisti që në kampionatin shqiptar ka luajtur për Partizanin, Dinamon, Tiranën dhe Vllazninë, bën të ditur se nuk do ta ndjek kryendeshjen e së shtunës as nga TV. "Këtë takim as do ta shoh fare në televizor. Këtë gjë ia kam shpjeguar stafit të Vllaznisë dhe të gjithë shokëve të skuadrës, pasi u detyrohem", - përfundoi 29vjeçari kryeqytetas, i cili gjatë këtij sezoni fillimisht u aktivizua për RNK Splitin në Kroaci dhe më pas luajti në katër muajt e fundit me Vllazninë e Shkodrës.