Shqiptarët në Europë, ja çfarë mund “të peshkojnë”
Skënderbeu më i favorizuari, gjasa për duele të një gjaku
Sezoni 2016- 2017 është drejt mbylljes dhe java e fundit mbetet të përcaktojë skuadrën që do të shoqërojë Korabin në Kategorinë e Parë. Ndërsa finalja e Kupës, Skënderbeu- Tirana, do të përcaktojë skuadrën e fundit shqiptare që do të shkojë në Europë. Nëse kupën e fiton Tirana, bardheblutë sigurojnë biletën direkte, në rast të kundërt bileta i shkon klubit që do të renditet i katërti në Superiore. Kukësi për herë të parë do të marrë pjesë në Champions dhe aventurën e nis në raundin e dytë paraeliminator. Partizani dhe Skënderbeu aventurën europiane e nisin nga raundi i parë paraeliminator i Ligës së Europës, së bashku me skuadrën e fundit shqiptare që do të përfaqësohet në Europë, Tirana ose ekipi që do të renditet i katërti. Në përgjithësi skuadrat shqiptare nuk janë të privilegjuara nga shorti, me përjashtim të Skënderbeut që ka koeficient më të lartë. KUKËSI
Kampionia më e re e Shqipërisë, Kukësi, e ka koeficientin 4.55 duke bërë pjesë në vazon e jo favoritëve dhe me shumë gjasa do "të peshkojë" një ekip të fortë. Ditë më parë presidenti Safet Gjici pat deklaruar për mediat Skoceze se dëshira e tij ishte që të përballej me Sëlltikun në Champions, si skuadra të pamposhtura në kampionet respektive. Shorti mund t'ia realizojë këtë dëshirë presidentit të Kukësit që në start të aventurës në Champions. Përveç kampionëve të Skocisë,
kundërshtarë të mundshëm për Kukësin mund të jenë: Red Bull Salzburg, Kopenhagen, Ludogorets, Bate Borizov, Partizan Beograd, Rozenborg, apo skuadrat e shqiptarëve, Karabaku i Ansi Agollit, ose Astana e
Azdren Llullakut.
PARTIZANI DHE SKËNDERBEU
Për skuadrat shqiptare që do të marrin pjesë në Ligën e Europës, në raundin e parë Skënderbeu mbetet më i privilegjuari, pasi ka koeficient
të lartë, 6.8 dhe ndodhet në vazon e parë. Për momentin edhe Partizani ndodhet te skuadrat që mund të kenë një kundërshtar të lehtë, por duke ditur se ende nuk janë përcaktuar të 102 ekipet që do të marrin pjesë në këtë raund, gjasat janë që të kuqtë të zbresin në grupin e skuadrave jo favorite. Partizani e ka koeficientin 3.05. Ndërsa skuadra e fundit shqiptare që do të sigurojë biletën në Europë, hyn te vazo e jofavoritëve. Skënderbeu mund të peshkojë në raundin e parë edhe fituesen e Kupës së Kosovës, që do të përcaktohet më 31 maj mes Llapit dhe Besës së Pejës. Shkëndija e Tetovës e ka koeficientin 3.375 dhe nuk është çudi që ata "të peshkojnë" ndonjë kundërshtar nga Shqipëria.