Lushnja, një makineri golash
Canka: Bashkë me Sefën shënuam thuajse në çdo takim, tani fitojmë titullin
Lushnja praktikisht ka mbyllur sezonin pasi ka realizuar objektivin që ishte vendosur që në fillim, kalimin në Kategorinë Superiore. Por, skuadra e teknikut Artan Bano vijon të jetë në fushë duke u përgatitur për ndeshjen e fundit zyrtare që është finalja e Kategorisë së Parë. Nesër verdhejeshilët do të njihen me kundërshtarin dhe do të vijojnë me përgatitjet për superfinalen e fundjavës së ardhshme ku do të jepet dhe titulli simbolik i Kategorisë së Parë. Në këtë sezon të suksesshëm të lushnjarëve, ajo që spikati në mënyrë të vazhdueshme ishte dyshja e sulmit CankaSefa. Kjo dyshe shënoi 23 gola për Lushnjën. Gjysmën e golave të Lushnjës, pasi në total verdhejeshilët regjistruan 44 rrjeta. 13 gola i shënoi Canka dhe 10 gola i shënoi Sefa.
CANKA - Në një prononcim për gazetën "Panorama Sport", golashënuesi më i mirë i lushnjarëve Mikel Canka shprehet: "Ka qenë një sezon i dominuar nga ana jonë nga fillimi deri në fund. Jam shumë i kënaqur me golat e shënuar. Bashkë me Sefën kemi shënuar gati në çdo ndeshje. Tani po përgatitemi për ndeshjen e fundit për të sjellë trofeun tjetër në Lushnjë. Është sezoni i dytë radhazi që festoj. Vitin e kaluar me Luftëtarin dhe tani me skuadrën e zemrës Lushnjën. Unë gjithnjë kam besim te goli dhe shpresoj të shënoj në finalen e titullit të kësaj kategorie", deklaroi sulmuesi 30vjeçar, Canka.
TRADITA - Lushnja e ka traditë titullin kampion të aktivitetit të dytë futbollistik për nga rëndësia në vendin tonë. Për herë të parë e ka fituar në vitin 1961 dhe për herë të fundit
në vitin 2013. Lushnja ka fituar finale si me Naftëtarin, Bylisin, ndërsa tani pret të luajë me Kamzën ose me Besëlidhjen. "Veterani" Gentian Çela për gazetën "Panorama Sport" shprehet: "E kam një medalje të tillë dhe dua të marr një të dytë", tha mesfushori 36vjeçari Çela. Lushnjarët po përgatiten shumë të motivuar për finalen e fundjavës së ardhshme. Verdhejeshilët do të mësojnë vetëm nesër kundërshtarin që do të kenë përballë, një mes Kamzës ose Besëlidhjes. Lushnja siguroi rikthimin në Superiore pas tre vitesh mungesë.