Liga e Europës, Thaka: Finalet, mision i arritshëm

"Mes grupit ka shumë harmoni, besojmë te kualifikimi"

Premiera në Ligën e Europës shërbeu si trampolinë për t'u bërë pjesë në një nga kampionatet elitarë të volejbollit europian, Poloni. Volejbollistja e Kombëtares shqiptare, Sava Thaka, do të kontribuojë edhe në këtë përfaqësim në arenën ndërkombëtare. Në një intervistë për "Panorama Sport", qendra kuqezi e sheh të mundshëm kualifikimin për në raundin final.

Si po shkon grumbullimi?

Për dijeni, grumbullimi me kombëtaren ka filluar në datën 15. Këtë vit ka shumë prurje të reja, volejbolliste shqiptare që luajnë jashtë Shqipërisë. Aktualisht po stërvitemi shumë që në Europa Ligë të kalojmë grupin dhe mendoj se mundësitë janë të mëdha. Sa i njihni kundërshtarët? Nga kundërshtarët njohim vetëm Bjellorusinë, pasi kemi luajtur edhe vitin e kaluar në po të njëjtin grup. Ka shumë nivel si ekip, megjithatë në ndeshjet që u zhvilluan në Durrës ne fituam 3-2.

Fakti që ka shumë prurje të reja sa do të ndikojë kjo në përshtatje në kohë me grupin?

Ne kemi bashkë prej një jave dhe mund të them se fryma e grupit është krijuar që tani. Vajzat kuptohen shumë me njëra-tjetrën, pra në grup ka shumë harmoni.

Ju vini nga një përvojë në Poloni, si shkoi si sezon dhe sa ka vlejtur në nivelin tuaj personal?

Për mua, ky ishte sezoni i parë jashtë Shqipërisë. Orlen Liga polake (superliga) është një ndër kampionatet më të forta në botë dhe niveli sigurisht ndryshon shumë me kampionatin tonë. Një vit atje më ka përmirësuar shumë profesionalisht si volejbolliste.

Do të vazhdoni edhe vitin e ardhshëm në Poloni?

Në fakt, është akoma pak herët pasi kampionatin në Poloni e kam mbyllur para

dy javësh. Në momentin që flasim, kam pasur disa oferta, por akoma nuk kam bërë një zgjedhje.

Sa koherente keni qenë me kampionatin shqiptar?

I kam ndjekur ndeshjet e "play off"-it "livestream" kur nuk kam pasur angazhime. Më vjen keq që niveli në Shqipëri është i dobët. Kjo ndodh për shumë arsye të ndryshme.

Mos ndoshta niveli në kampionatin shqiptar është reflektuar edhe në përzgjedhjen e kandidateve që luajnë jashtë Shqipërisë?

Për këtë çështje mund të them se kjo ka qenë përzgjedhja e trajnerëve.

Duke iu rikthyer kombëtares, çfarë ka pikë të fortë në këto eliminatore?

Vjet kemi pasur grupin. Edhe ekipet e tjera na kanë vënë në dukje që ishim ekipi më me harmoni. Sa u përket përgatitjeve të deritanishme, stafi teknik u ka dhënë më tepër prioritet elementëve teknikë.

Mund të themi që kjo është kombëtarja më e mirë e sezoneve të fundit?

Për këtë duhet të presim rezultatet e këtij viti.