Uoriors, kampione e Perëndimit
Kalifornianët kualifikohen në "Finals" për të tretin sezon radhazi. Presin Klivlendin
Dymbëdhjetë fitoret dhe zero humbje: bilanc rekord. Vazhdon rrugëtimin triumfues Golden Steit Uoriors që kalojnë San Antonio Spërs në shifrat e përgjithshme 129115 në finalen e katër të Konferencës së Perëndimit dhe hipotekojnë "Finals" e NBAsë për të tretin sezon radhazi. Edhe kësaj here përcaktues kanë qenë 36 pikët e Stefen Kurri dhe 29 pikët e 12 topat në tabelë të Kevin Durant. Për teksanët, të privuar nga Parker dhe Leonard nuk ishin të mjaftueshme 20 pikët e Kili Anderson. Portland, Jutah dhe San Antonio ishin kundërshtarët që kanë provuar për të ndaluar marshin fitues të skuadrës kalifor-
niane në këtë "play off". Por jo vetëm që asnjë prej tyre nuk e prishi serinë pozitive të "Luftëtarëve", por asnjë ekip nuk ishte në gjendje për të fituar një ndeshje të vetme. Djemtë e trajnerit Stiv Kerr janë kualifikuar për të tretin vit radhazi për në aktin final të sezonit me një ecuri mbresëlënëse prej 12 fitoreve dhe asnjë humbje. Një rekord për NBA-në që kur raundi i parë u vendos të luhej me shtatë ndeshje. Edhe në mbrëmjen e radhës nënkampionët bënë detyrën ndaj San Antonios duke u rikonfirmuar një makineri e koshave pa asnjë defekt. Në fundin e finaleve të Konferencës, Golden Steit arriti të shënojë në total 498 pikë, një tjetër rekord për NBA-në. Nëse në finalen e tretë ishte në hije, tek e katërta protagonisti i "AT & T Center" është Stefen Kurri, duke mbyllur me një provë "mbretërore": 36 pikë, 5 topa në tabelë, 6 asiste dhe 5 trepikësha. Loja nuk u vu për asnjë moment në diskutim, ndërsa liderët e Perëndimit udhëheqin në 12 minutat e para 31-19 duke mos u dhënë më hapësirë të zotëve të shtëpisë për një mrekulli. Por për
Spërsat, si të mos mjaftonte fakti që sfidonin skuadrën e pathyeshme, ata i ndoqi fati i keq për listën e gjatë të lojtarëve të dëmtuar, respektivisht Kauhi Leonard, Toni Parker dhe Devid Li. Sakaq mbrëmja e së hënës pritet të jetë ndeshja e fundit në NBA për Manu Xhinobilin, 40-vjeçar. "Një luftëtar i jashtëzakonshëm. Ka qenë gjithmonë një kënaqësi që të luaje kundër tij", ishte mesazhi i Kevin Durant, autor i 29 pikëve dhe 12 kërcime.