Mrekulli e Vinçenco Nibalit, rihapet Xhiro e Italisë
Vinçenco Nibali është protagonisti i etapës së 16-të të Xhiros së Italisë nga Roveta në Bormio, 222 km e gjatë. "Peshkaqeni" shpërthen në sprintin final për të arritur triumfin e parë italian në edicionin e 100-të. I vetmi që tentoi për të mbajtur ritmin e Nibalit ishte spanjolli Landa, por italiani ka qenë vendimtar "in extremis" duke prishur "agjërimin" vendës që zgjati që prej prologut të garës së njëqindvjetorit. Vendi i tretë shkoi për Nairo Kuintana (Movistar). Ndërsa çiklisti shqiptar Eugert Zhupa e mbylli etapën në vend të 138- të, + 51'21" nga Nibali. Edhe pas këtij pedalimi, holandezi Tom Dumulin ruan fanellën rozë, ndonëse avantazhi i tij zbret tashmë në 31 sekonda nga Kuintana dhe 1'12" nga Nibali. Zhupa pozicionohet përkohësisht i 143-ti, +3h06'41" nga fanella rozë. Etapa e sotme mund të ndikojë në një përmbysje të klasifikimit të përgjithshëm. Çiklistët do të ndjekin itinerarin Tirano-Kanazei, 219 km. Sakaq per- formanca e shqiptarit të vetëm në një nga tre "Grand Tour"-et më të rëndësishme të çiklizmit botëror po tërheq vëmendjen edhe të mediave prestigjioze. Zhupa ka rrëfyer momentet e para të emigracionit. "Kur unë linda në vitet '90, në Shqipëri kishte kaos. Babai im erdhi si klandestin si shumë të tjerë dhe ngadalë nisi të punonte e të bënte dokumentet edhe për ne. Shumë gjëra nuk do t'i kisha bërë dot në Shqipëri, nuk do të kisha shanset që kam këtu", shprehet ai. Zhupa merr pjesë për të tretin edicion radhazi në Xhiron e Italisë dhe garon për skuadrën e Wilier- Southeast.
Incidenti- Në etapën e djeshme, ndodhi edhe një incident me Dumulin, i cili detyrohet të bëjë "pit stop" të detyruar. 32 kilometra nga fundi i etapës së 16- të, holandezi zbret nga biçikleta menjëherë për të kryer nevojat personale.