Barça kërkon hetim ndaj Malagës: Toleroi Realin
Kërkesë presidentit të Ligës për një veprim të Vilanuevës
Barcelona shpresonte shumë se Malaga mund të arrinte të fitonte ndaj Realit të Madridit, çka do t'u jepte mundësinë katalanasve që të siguronin titullin kampion. Por, ajo që u vu re në fushën e lojës ishte diçka krejt tjetër, ku skuadra e trajnerit Mishel ishte e paaftë për të rezistuar ndaj merengesve, pasi u mundën me rezultatin 0-2. Në fakt, ishte e vështirë të arrihej në konkluzionin se vendësit u sforcuan shumë, pasi ekipi i Zidanit arriti të gjente rrugën e rrjetës pas vetëm dy minutash lojë. Pikërisht për këtë episod ka edhe dyshimet e veta klubi i Barcelonës. E përditshmja katalanase
"El Mundo Deportivo" ka publikuar një lajm, ku thuhet se zyrtarë të Barçës kanë bërë kërkesë zyrtare te presidenti i Ligës, Havier Tebas, që ky i fundit të nisë një hetim për futbollistët e Malagës dhe, mbi të gjitha, për Vilanuevën. Mbrojtësi ka hapur këmbët brenda zonës, në një veprim vërtet të çuditshëm,
i cili i dha mundësinë Kristiano Ronaldos të shënojë me lehtësi të madhe në minutën e dytë të lojës. Duke ditur rëndësinë e kësaj ndeshjeje dhe sjelljen e pazakontë që patën lojtarët e Malagës në fushë, është kërkuar që të ketë hetim për të kuptuar se cila ishte arsyeja e atyre veprimeve. Në fakt, akuza e tyre për tolerim, ka edhe si synim që të hedhë të përbaltë disi sigurimin e titullit kampion nga ana e rivalëve historikë të Realit. Pikërisht para javës së fundit të kampionatit, Luis Enrike tha në konferencë shtypi se: "Dua që Mishel dhe futbollistët e tij të tregohen profesionistë. Kam besim që nuk do tundohen nga dëshirat personale që të fitojë Reali, por do të japin më të mirën në fushën e lojës. Jam optimist që do arrijnë të marrin tri pikët". Deklarata e tij lidhej edhe me të shkuarën e trajnerit të Malagës, i cili ka luajtur më shumë se një dekadë me fanellën e klubit madrilen.