Mali i Zi fiton testin e parë me Shqipërinë

Në Budva të Malit të Zi u zhvillua dje në mbrëmje një ndeshje stërvitore mes kombëtares vendase dhe asaj të Shqipërisë në volejboll për femra, e cila do t'i paraprijë miqësores zyrtare që do të zhvillojnë dy skuadrat ditën e sotme. Sipas informacionit të bërë publik nga Federata Shqiptare e Volejbollit, ndeshja e djeshme stërvitore ishte me 5 sete dhe u dha mundësi trajnerëve të shihnin nga afër jo vetëm gjendjen e skuadrës, por edhe të bëjnë një evidentim të punës së kryer gjatë 10 ditëve të para grumbullim. Jo vetëm kaq, por në fushë u aktivizuan të gjitha vajzat që trajnerët Altin Martiri e Roland Tarja kishin në dispozicion. Trajnerët, pas tri seteve të para, ranë dakord të luanin edhe dy të tjera. Rezultatet e 5 seteve janë: 25-23, 2519, 26-24, 25-19 dhe 28-26, të gjitha në favor të Malit të Zi. Ndërkohë sot do të zhvillohet miqësorja zyrtare mes dy skuadrave. Siç dihet, kombëtarja do të marrë pjesë në Ligën e Europës, që zhvillohet në qershor dhe këto sfida shërbejnë për të ndërtuar një ekip sa më kompetitiv në arenën ndërkombëtare. Pas dy ndeshjeve miqësore në Budva me përfaqësuesen vendëse të Malit të Zi, Federata Shqiptare e Volejbollit ka planifikuar të zhvillojë

sërish dy miqësore (në Gjilan) me ekipin vendës të Kosovës ditën e shtunë. Shqipëria ndodhet në Grupin A të Ligës së Europës në edicionin e saj të dytë radhazi, bashkë me Finlandën, Austrinë e Bjellorusinë. Ndeshjet e para do të luhen më datat 9-11 qershor, në Tiranë.